Испанийн хамгийн том банк болох Banco Santander нь биткойны зах зээлд хөрөнгө оруулалт хийснээ албан ёсоор мэдээллээ. АНУ-ын Үнэт цаас, биржийн хороонд (SEC) ирүүлсэн тайлангаас үзэхэд, Мадридад төвтэй тус банк нь BlackRock-ийн iShares Bitcoin Trust сангаар дамжуулан 129,615 ширхэг хувьцаа худалдан авсан байна. Энэхүү хөрөнгө оруулалтын нийт дүн 4.3 сая ам.доллар болжээ.
Энэхүү алхам нь уламжлалт санхүүгийн байгууллагууд зах зээлийн үнэлгээгээр тэргүүлэгч криптовалютад хөрөнгө оруулах сонирхолтой байгаагийн бас нэгэн тод жишээ юм. BlackRock-ийн IBIT сан нь хөрөнгө оруулагчдад биткойныг шууд эзэмшиж, хадгалах шаардлагагүйгээр уг хөрөнгийн үнийн өсөлтөөс ашиг олох боломжийг олгодог. Хувьцаанууд нь хөрөнгийн бирж дээр арилжаалагддаг тул брокерийн дансаар дамжуулан хурдан бөгөөд хялбар худалдан авах боломжтой байдаг.
Санхүүгийн байгууллагуудын хандлага
Сүүлийн нэг жилийн хугацаанд Banco Santander-ийн дижитал банк болох Openbank нь харилцагчиддаа биткойн болон бусад криптовалют худалдан авах боломжийг олгож, дижитал хөрөнгийн зах зээлд илүү ээлтэй хандах болсон юм. BlackRock-ийн IBIT сан нь одоогоор 46.9 тэрбум ам.долларын хөрөнгийг удирдаж байгаа бөгөөд бусад крипто ETF сангуудтай харьцуулахад хамгийн амжилттайд тооцогдож байна.
2024 онд АНУ-ын Үнэт цаас, биржийн хорооноос олон тооны Bitcoin ETF-ийг зөвшөөрсний дараа томоохон байгууллагууд энэ зах зээлд идэвхтэй нэвтрэх болсон. Өмнө нь олон хөрөнгө оруулагчид биткойныг хадгалах, хувийн түлхүүр (private key) ашиглах зэрэг асуудлаас болж болгоомжилдог байсан бол ETF батлагдсанаар шинэ хөрөнгө оруулалт энэ салбарт олноор орж ирэх болжээ. Одоогоор АНУ-ын биткойны сангууд нийтдээ 83 тэрбум гаруй ам.долларын хөрөнгө удирдаж байна.
