Их Британийн Ерөнхий сайд Кир Стармер даваа гарагт хийсэн хэвлэлийн хурлын үеэр 16-аас доош насны хүүхдүүдийг TikTok, Snapchat, YouTube зэрэг сошиал медиа платформуудыг ашиглахыг хориглох хатуу байр суурьтай байгаагаа илэрхийлэв. Энэхүү шийдвэр нь өсвөр насныхныг цахим орчин дахь хортой контент, дээрэлхэлт болон хэт их дэлгэцийн хэрэглээнээс үүдэлтэй сэтгэцийн эрүүл мэндийн асуудлуудаас хамгаалах зорилготой юм.
Кир Стармер технологийн аварга компаниуд энэхүү шийдвэрийг эсэргүүцэх магадлалтайг хүлээн зөвшөөрсөн ч “Бид хүүхдүүдийнхээ аюулгүй байдал, аз жаргал дээр ямар ч буулт хийхгүй” хэмээн хатуу мэдэгдлээ. Түүний хэлснээр, хэрэв технологийн компаниуд засгийн газрын энэхүү бодлогыг эсэргүүцвэл хуулийн хүрээнд тэмцэхэд бэлэн байгаа аж.
Олон улсад сошиал медиа нь хүүхдүүдийн өөртөө итгэх итгэлд сөргөөр нөлөөлж, нойргүйдэл болон сэтгэл гутралд хүргэж байна гэсэн шүүмжлэлүүд тасрахгүй байгаа. Британийн засгийн газар уг хоригийг хэрэгжүүлэхдээ өсвөр насныхан хоригийг тойрч гарах арга хайхыг үгүйсгээгүй ч, энэ нь хүүхдүүдийг хамгаалах чиглэлд хийж буй томоохон алхам гэж үзэж байна.
Энэхүү санаачилга нь зөвхөн Их Британид төдийгүй дэлхий даяар хүүхдүүдийн цахим аюулгүй байдлын талаарх маргааныг дахин дэгдээж байна. Одоогоор уг хоригийг хэрхэн техникийн түвшинд хэрэгжүүлэх, эцэг эхчүүдийн оролцоо ямар байх талаарх дэлгэрэнгүй мэдээлэл удахгүй тодорхой болох юм.
