Их Британийн хаан Чарльз хааны гэр бүлийн олон жилийн уламжлалыг эвдэж, өөрийн төлсөн татварын хэмжээг анх удаа олон нийтэд ил болголоо. Албаны хүмүүсийн мэдээлснээр, хаан 2024/25 оны санхүүгийн жилд 12.9 сая фунт стерлинг буюу 17.04 сая ам.долларын татвар төлсөн байна. Энэхүү баримт нь түүнийг Их Британийн хамгийн их татвар төлөгчдийн эхний 100-д багтааж байгаа юм.
Үүний зэрэгцээ хааны ордноос чухал мэдэгдэл хийсэн нь Букингэмийн ордонтой холбоотой байв. Ирэх жил дуусах 10 жилийн хугацаатай их засварын ажил дууссаны дараа хаан Чарльз тус ордонд амьдрахгүй гэдгээ мэдэгджээ. Ингэснээр сүүлийн хоёр зуу орчим жилийн турш Лондоны төв дэх уг түүхэн байгууламж Британийн хаадын үндсэн оршин суух газар байсан уламжлал ийнхүү өөрчлөгдөж байна.
Хааны гэр бүлийн зүгээс ил тод байдлыг нэмэгдүүлэх амлалт өгсөн бөгөөд энэхүү татварын мэдээллийг ил болгосон нь тус амлалтын нэг хэсэг юм.
