Их Британийн эрүүл мэндийн салбарт үүсээд байсан хурцадмал байдал намжлаа. Тус улсын залуу эмч нар (resident doctors) засгийн газраас гаргасан цалин хөлс болон ажлын нөхцөлийг сайжруулах шинэ саналыг хүлээн авснаар, даваа гарагийн өглөө 07:00 цагт эхлэхээр байсан долоо хоногийн хугацаатай ажил хаялтаа цуцалсан байна.
Энэхүү ажил хаялт нь Их Британийн Үндэсний эрүүл мэндийн албаны (NHS) үйл ажиллагаанд томоохон хүндрэл учруулах эрсдэлтэй байсан юм. Эмч нарын үйлдвэрчний эвлэл болон засгийн газрын хооронд удаан хугацаанд үргэлжилсэн хэлэлцээрийн үр дүнд талууд зөвшилцөлд хүрч чадлаа. Засгийн газрын зүгээс гаргасан шинэ санал нь эмч нарын урт хугацааны шаардлагыг тусгасан бөгөөд үүнийг эмч нар ажил хаяхаас илүүтэйгээр яриа хэлэлцээг үргэлжлүүлэх боломж гэж үзжээ.
Их Британид залуу эмч нар гэдэг нь анагаахын сургуулиа төгсөөд мэргэшүүлэх сургалтад хамрагдаж буй эмч нарыг хэлдэг бөгөөд тэд тус улсын эрүүл мэндийн салбарын гол нуруу болдог. Сүүлийн жилүүдэд инфляцын өсөлттэй холбоотойгоор цалингийн нэмэгдэл шаардсан эмч нарын эсэргүүцэл олон удаагийн ажил хаялтаар үргэлжилж, эмнэлгийн тусламж үйлчилгээнд саатал учруулж байсан билээ.
Энэ удаагийн тохиролцоо нь зөвхөн ажил хаялтыг зогсоогоод зогсохгүй, эрүүл мэндийн салбарт тулгамдаж буй хүний нөөцийн хомсдол болон ажлын ачааллыг шийдвэрлэхэд чиглэсэн эхний алхам болно гэж талууд үзэж байна. Одоогоор эмч нар хуваарийн дагуу ажилдаа хэвийн орох бөгөөд иргэдэд үзүүлэх эмнэлгийн тусламж үйлчилгээ тасалдахгүй болов.
Эрүүл мэндийн салбарын мэргэжилтнүүд энэхүү үйл явдлыг эерэг алхам хэмээн дүгнэж байгаа ч, цаашид тогтвортой байдлыг хангахын тулд засгийн газраас илүү цогц бодлого хэрэгтэйг онцолж байна.
