АНУ-ын Калифорни мужийн захирагч Гэвин Ньюсом есдүгээр сарын 27-нд AB 2409 хуулийн төсөлд гарын үсэг зурж, улс төрийн мемкойнд хоёр үндсэн хязгаарлалт тогтоолоо. Шинэ хуулиар Калифорни мужийн тодорхой төрийн албан тушаалтнууд болон төрийн зарим ажилтнуудад мемкойн гаргахыг бүрэн хориглож байгаа юм. Мөн дижитал хөрөнгийн үйлчилгээ үзүүлэгч компаниудад албан тушаалтантай холбоотой шинэ мемкойнуудыг Калифорнийн оршин суугчдад зориулан бүртгэж арилжаалахыг хязгаарласан тусдаа заалт тусгагджээ.
Хуульд зааснаар дижитал хөрөнгийн үйлчилгээ үзүүлэгчдэд тавигдах шаардлага нь 2027 оны нэгдүгээр сарын 1-ний өдөр болон түүнээс хойш гаргасан койнуудад үйлчилнэ. Хэрэв уг зоосыг холбооны, муж улсын эсвэл орон нутгийн төрийн албан тушаалтан санал болгосон эсвэл тэдэнтэй хамтран гаргасан бол үйлчилгээ үзүүлэгчид Калифорнийн оршин суугчдад зориулан борлуулах, худалдан авах зорилгоор жагсаалтдаа бүртгэхийг хориглохоор заажээ.
Хуулийн үйлчлэх хүрээ ба мемкойны тодорхойлолт
Шууд мемкойн гаргахыг хориглосон заалтад Калифорнийн муж болон орон нутгийн сонгогдсон, томилогдсон албан тушаалтнууд, хууль тогтоогчид, төрийн зөвлөл, хорооны гишүүд хамаарна. Зөвхөн зөвлөх эрхтэй байгууллагын гишүүд хүртэл энэ тодорхойлолтод багтсан байна. Түүнчлэн худалдан авах ажиллагаа, гэрээ байгуулах шийдвэр гаргах эрх мэдэл бүхий төрийн ажилтнууд мөн энэ хоригт хамаарахаар болжээ.
Хуулийн эх бичвэрт мемкойныг олон нийтийн сонирхол, таамаглал, эсвэл олон нийтийн оролцооноос гол үнэ цэн нь бүрддэг, интернэт мем, олон нийтийн зүтгэлтэн, зохиомол дүр, цаг үеийн үйл явдал эсвэл нийгмийн чиг хандлагатай холбоотой дижитал хөрөнгө хэмээн тодорхойлсон байна. Мөн мемкойныг олон нийтэд худалдан авах, хандивлах эсвэл ямар нэг үнэ цэнээр солилцох боломжтой болгохыг "гаргах" (issue) үйлдэл гэж үзэх аж.
Калифорнийн Ерөнхий прокурор дээрх хоригийг зөрчсөн тохиолдолд үйл ажиллагааг зогсоох шийдвэр гаргуулахаар шүүхэд хандах болон хууль бусаар олсон орлогыг хураалгах (disgorgement) арга хэмжээ авах боломжтой юм.
