Африкийн Конго улсад Эбола вирусний халдварын тархалт хяналтаас гарч болзошгүй нөхцөл байдал үүсээд байна. Энэхүү дэгдэлтийн голомт нь Итури мужийн 130,000 хүн амтай, алтны уурхай бүхий ядуу хот болох Монгбвалу хотод байгаа юм.
Дэлхийн эрүүл мэндийн байгууллага (ДЭМБ)-аас мэдээлж буйгаар тус бүс нутагт Эболагийн эсрэг вакцинжуулалт болон бусад арга хэмжээг хэрэгжүүлэхэд нутгийн иргэдийн итгэлгүй хандаж байгаа нь ихээхэн саад учруулж байна. Орон нутгийн иргэд эрүүл мэндийн ажилтнуудыг хуурамч мэдээлэл тарааж, өвчнийг зориудаар дэгдээж байна гэж хардаж байгаа аж. Мөн зэвсэгт бүлэглэлүүдийн идэвхтэй үйл ажиллагаа нь нөхцөл байдлыг улам хүндрүүлж, эмнэлгийн ажилтнууд аюулгүй байдлын улмаас ажиллахад хүндрэл учруулж байна.
Эбола вирус нь маш аюултай бөгөөд халуурч, дотор муухайрч, бөөлжих, дотоод цус алдах зэрэг шинж тэмдгүүд илэрдэг. Халдвар авсан хүмүүсийн нас баралтын хувь өндөр байдаг тул халдварыг хяналтандаа авах нь нэн чухал юм.
ДЭМБ болон бусад олон улсын байгууллагууд Конгогийн засгийн газартай хамтран Эболагийн тархалтыг зогсоохын төлөө шаргуу ажиллаж байна. Гэсэн хэдий ч орон нутгийн иргэдийн итгэлийг олж авах, аюулгүй байдлыг хангахгүй бол энэ өвчнийг хяналтандаа авах нь маш хэцүү байх болно.
