АНУ-ын Лос-Анжелес хотод гарсан нэгэн эмгэнэлт явдал олон нийтийн сүлжээгээр хүчтэй шүүмжлэл дагуулж байна. Өнгөрсөн бямба гарагт тус хотын цагдаагийн алба хаагч Жэймсон нэртэй нохойг олон удаа буудаж хөнөөсөн хэрэг гарчээ. Тухайн үед цагдаагийн алба хаагчийн биед байсан камерын бичлэг олон нийтэд ил болсноор хэргийн бодит нөхцөл байдал тодорхой болсон юм.
Бичлэгээс харахад, цагдаагийн ажилтан нохойг газарт унасны дараа ч дахин буудсаар байгаа нь дүрслэгдсэн байна. Нохойны эзэн Мари болон түүний гэр бүлийнхэн энэхүү үйлдлийг “хэтэрхий болчимгүй, балмад” хэмээн тодорхойлж, хууль сахиулагчийн ёс зүйгүй байдлыг эрс буруушааж байна. Тэдний хэлж буйгаар, нохой нь ямар ч аюул заналхийлэл учруулаагүй байхад ийм харгис арга хэмжээ авсан нь хүлээн зөвшөөрөхийн аргагүй үйлдэл ажээ.
Энэхүү хэрэг нь АНУ-д цагдаагийн байгууллагын хүч хэрэглэх эрх болон амьтны эрхийн асуудлыг дахин хөндөж байна. Лос-Анжелесийн цагдаагийн газар уг асуудлаар дотоод мөрдлөг явуулж эхэлсэн бөгөөд олон нийт шударга шийдвэр гаргахыг шаардаж байна. Нохойны эзэд хайртай тэжээвэр амьтнаа алдсандаа гүн эмгэнэж байгаа бөгөөд холбогдох албаныхан уг үйл явдлыг нарийвчлан шалгана гэдгээ мэдэгджээ.
