Норвегийн алдартай дуучин, ая зохиогч Сюзанна Сундфөр өөрийн долоо дахь студийн цомог болох «Revelations Of Divine Love»-оо гаргахаар болсноо зарлалаа. Тус цомог нь аравдугаар сарын 2-нд «Bella Union» студиэр дамжин сонсогчдын хүртээл болох юм.
Шинэ цомог нь түүний 2023 онд гаргасан «blómi» цомгийн дараах бүтээл бөгөөд эх хүн болж, хөдөө орон нутагт амьдрах болсон туршлагаасаа үүдэн хайрын тухай шинэ ойлголтыг илэрхийлэхийг зорьжээ. Дуучин бүсгүй энэ талаар "Бид аймшигтай ертөнцөд амьдарч байна. Хүмүүс бие биедээ муу зүйл хийж, сэтгэл ханамжгүй байна. Хайр бол бүхний хариулт гэдэгт итгэхийн тулд заавал шашин шүтлэгтэй байх албагүй" хэмээн өгүүлсэн байна.
Уг цомгийг Норвегийн нэгэн сүмд зөвхөн хоолой болон эрхтэн хөгжим (pipe organ) ашиглан бичүүлжээ. Цомгийн дууны үгсийг 14-р зууны үеийн нууцлаг зохиолч Жулиан Норвичийн «Revelations of Divine Love» номоос сэдэвлэн бүтээсэн байна. Энэхүү бүтээл нь эмэгтэй хүн англи хэл дээр бичсэн анхны ном гэдгээрээ онцлог юм. Түүнчлэн уг цомгийг BBC Jazz шагналын эзэн Кит Даунс хамтран ажиллаж бүтээжээ.
Сюзанна Сундфөр цомог гарахаас өмнө өөрийн шинэ «I It Am» синглийг нийтэд цацсан байна. Тэрээр өмнө нь өгсөн ярилцлагадаа нийгмийн хуваагдал болон хүмүүс хоорондын харилцааны асуудлын талаар санаа зовниж буйгаа илэрхийлж байсан бөгөөд шинэ уран бүтээлээрээ дамжуулан хайр бол түгээмэл хүч гэдгийг онцлохыг зорьжээ.
