“Нью-Йорк Таймс” (The New York Times) бол дэлхийд нэр хүндтэй, Америкийн нөлөө бүхий сонин билээ. Тэд уншигчдаа мэдээллээр хангахын зэрэгцээ сүүлийн жилүүдэд таавар, оньсого, үгэн тоглоомуудыг цахим хувилбараар санал болгож байгаа нь олны таашаалд ихээхэн нийцсэн юм.
Тэгвэл тус сонин саяхан “Pips” хэмээх шинэ тоглоомоо танилцууллаа. Энэ нь домино хэлбэртэй, толгой сэтгэхүй сайжруулах зорилготой тоглоом бөгөөд энгийн дүрмээр тоглоход хялбар боловч, ялахын тулд бага зэрэг стратеги шаардлагатай аж. Тоглоомын дүрэм нь маш энгийн: танд өгөгдсөн домино чулуунуудыг хооронд нь тааруулан байрлуулж, аль болох өндөр оноо авах явдал юм. Чулуу бүр өөр өөрийн гэсэн тоотой байх ба ижилхэн тоотой чулуунуудыг холбосноор оноо цуглуулна.
“Pips” тоглоом нь хэрэглэгчдэд өдөр тутмын стрессээ тайлах, оюун ухаанаа хөгжүүлэхэд туслах зорилготой гэдгийг “Нью-Йорк Таймс”-ын зүгээс онцолж байна. Хэрэв та энэ тоглоомыг тоглож байхдаа гацаанд орвол санаа авахад туслах зөвлөгөө болон хариултууд бас бий. “Pips” тоглоомыг тус сонины цахим хуудаснаас шууд тоглох боломжтой.
