Нью-Йорк хотын Квинсбриджийн уугуул, хип хоп хөгжмийн домогт реппер Нас (Nas) 2026 оны BMI R&B/Hip-Hop шагналын гардуулах ёслолоос 'BMI Icon' шагналыг хүртэхээр болсон тухай BMI байгууллагаас албан ёсоор мэдэгдлээ. Энэхүү нэр хүндтэй шагналыг өмнө нь Лил Уэйн, Жеймс Браун, Снуп Догг, Жанет Жексон зэрэг хөгжмийн салбарын олон алдартан хүртэж байсан түүхтэй.
BMI-ийн Атланта дахь Бүтээлч үйл ажиллагаа хариуцсан дэд ерөнхийлөгч Кэтрин Брютон репперийн оруулсан хувь нэмрийг онцлон дурдахдаа: "Нас өөрийн гайхалтай түүх өгүүлэх чадвар, шүлгийн өндөр ур чадвар, уран бүтээлийн шинэлэг байдлыг эрхэмлэх замаар хип хоп хөгжмийг тодорхойлж, хөгжүүлсэн. Тэрээр үе үеийн уран бүтээлчдэд урам зориг өгч, соёлд нөлөөлж, хип хоп хөгжмийн өнгө аясыг бүтээлцсээр ирсэн жинхэнэ икон юм" хэмээн мэдэгдэлдээ дурджээ.
Шагнал гардуулах ёслол 2026 оны наймдугаар сарын 26-нд Лос-Анжелес хотод болох бөгөөд энэ үеэр Нас-ын хип хоп хөгжмийн салбарт оруулсан нөлөө болон түүний дуу зохиох онцгой авьяасыг албан ёсоор үнэлэх юм. Мөн тус арга хэмжээгээр өнгөрсөн нэг жилийн хугацаанд хамгийн их тоглогдсон R&B болон хип хоп дуунуудын зохиолчид, продюсерууд болон хэвлэн нийтлэгчдийг шагнаж урамшуулна.
Нас-ын хувьд өмнө нь 2021 онд анхны Грэммийн шагналаа хүртэж байсан бөгөөд Billboard Hot 100 жагсаалтад 27 удаа багтаж, Billboard 200 жагсаалтыг тэргүүлсэн таван бие даасан цомогтой арвин их уран бүтээлийн намтартай уран бүтээлч юм. Тэрээр саяхан Нью-Йорк хотын Янки цэнгэлдэх хүрээлэнд болсон Жей-Зигийн тоглолтын үеэр тайзнаа хамт гарч ирсэн нь олны анхаарлыг татаад байсан билээ.
