Дэлхийн рок хөгжмийн ертөнцийн амьд домог, 70-аад оны үеийн гитарын гоцлол хөгжмийн мастер Питер Фрэмптон өдгөө 76 настай ч уран бүтээлээсээ хөндийрөөгүй байна. Гэвч түүний амьдрал болон хөгжим тоглох арга барилд нь томоохон өөрчлөлт гарчээ. "Inclusion Body Myositis" буюу булчингийн эд эс үхжих өвчнөөр оношлогдсон тэрээр өөрийн эрүүл мэндийн байдал болон тэмцлийнхээ талаар Billboard сэтгүүлд ярилцлага өгсөн байна.
Энэхүү өвчин нь булчинг аажмаар сулруулж, хөдөлгөөний чадварыг хязгаарладаг хүнд хэлбэрийн эмгэг юм. Гитарчны хувьд гар, хурууны хөдөлгөөн хамгийн чухал байдаг тул энэ нь түүний карьерын хувьд том сорилт болжээ. Гэсэн хэдий ч Фрэмптон шантрахыг хүсэхгүй байна. Тэрээр "Би өвчнийхөө төгсгөл хаашаа чиглэж байгааг мэдэж байна. Гэхдээ энэ нь намайг огтхон ч айлгахгүй, сэтгэлээр унагаахгүй байна" хэмээн өөдрөг үзэлтэй байгаагаа илэрхийлжээ.
Тэрээр өвчнийхөө улмаас гитар тоглох техникээ бүрэн өөрчлөх шаардлагатай болсон ч хөгжимдөө үнэнч хэвээр байна. "Би өмнөх шигээ хурдан тоглож чадахгүй байж болох ч, өөр арга барилаар хөгжмөө илэрхийлж байна" гэж тэрээр нэмж хэлэв. Түүний энэ хичээл зүтгэл нь зөвхөн хөгжимчид төдийгүй хүнд өвчтэй хүмүүст урам зориг өгөх том жишээ болж байгаа юм.
Питер Фрэмптон нь 1976 онд гаргасан "Frampton Comes Alive!" цомгоороо дэлхийд алдаршсан бөгөөд рок хөгжмийн түүхэнд өөрийн гэсэн тод мөрийг үлдээсэн уран бүтээлч билээ. Өдгөө тэрээр өвчнийхөө эсрэг тэмцсээр байгаа ч тайзан дээр гарах эрч хүчээ алдаагүй хэвээр байна.
