АНУ-ын Сансар судлалын агентлаг буюу NASA-гийн мэдээлснээр наймдугаар сарын 24-ний байдлаар Сар томорч буй (Waxing Gibbous) үе шатандаа шилжиж, нийт гадаргынх нь 86 хувь нь гэрэлтэн харагдаж байна. Дараагийн бүтэн буюу тэргэл сар наймдугаар сарын 28-нд гарах төлөвтэй байна.
Сарны гадаргаас юу ажиглаж болох вэ?
Тэргэл сар гарахад хэдхэн хоног үлдээд буй энэ үед Сарны гадаргын онцлогуудыг ажиглах боломж өндөр байна. Тухайлбал, энгийн нүдээр ямар нэгэн хэрэгсэлгүйгээр Сарны Mares Vaporum, Tranquillitatis болон Fecunditatis хэмээх хэсгүүдийг харах боломжтой аж.
Харин дуран (binoculars) ашиглавал дээрх хэсгүүдээс гадна Clavius тогоо, Mare Frigoris болон Mare Nectaris зэргийг илүү тод харж болно. Түүнчлэн телескоптой хүмүүст Apollo 11, 14 болон 17 хөлгүүдийн газардсан цэгүүдийг ажиглах боломж бүрдэж байна.
Сарны үе шатууд хэрхэн явагддаг вэ?
Сар дэлхийг тойрон эргэх явцдаа ойролцоогоор 29.5 хоногт нэг мөчлөгийг туулдаг гэж NASA тайлбарлажээ. Нар, Дэлхий болон Сарны байрлалаас шалтгаалан Сарны гэрэлтэж буй хэсэг дэлхийгээс харилцан адилгүй харагддаг байна. Энэхүү эргэлтийн хугацаанд сар нарийн хавирган сарнаас хагас сар, улмаар тэргэл сар болж дараах үндсэн найман үе шатыг дамждаг:
* Шинэ сар (New Moon): Сар Дэлхий ба Нарны хооронд байрлах тул бидэнд харагдах тал нь харанхуй, энгийн нүдэнд үзэгдэхгүй байна.
* Томорч буй хавирган сар (Waxing Crescent): Баруун талд нь багахан гэрэлтсэн хэсэг гарч ирнэ (Бөмбөрцгийн хойд хагаст).
* Эхний дөрөвний нэг (First Quarter): Баруун хагас нь гэрэлтэж, хагас сар мэт харагдана.
* Томорч буй хагас сар (Waxing Gibbous): Гадаргын талаас илүү хувь нь гэрэлтэх боловч бүрэн тэргэл болоогүй байна.
* Тэргэл сар (Full Moon): Сарны бүтэн гадарга гэрэлтэж, бүрэн харагдана.
* Багасч буй хагас сар (Waning Gibbous): Баруун талаасаа гэрлээ алдаж эхэлнэ.
* Сүүлийн дөрөвний нэг (Third Quarter): Зүүн тал нь гэрэлтэж харагдах дахин нэг хагас сар.
* Ширгэж буй хавирган сар (Waning Crescent): Бүрэн харанхуй болохоос өмнө зүүн талд нь нарийн гэрэл үлдэнэ.
