Сикхийн нэрт салан тусгаарлагч Гурпатвант Сингх Паннун түүний амь насанд дахин бодит аюул занал учирсан тухай АНУ-ын Холбооны мөрдөх товчоо (FBI) болон Канадын хааны морьт цагдаагийн албанаас (RCMP) анхааруулсан болохыг мягмар гарагт мэдэгдлээ.
"Sikhs For Justice" байгууллагын ерөнхий хуулийн зөвлөхөөр ажилладаг түүний хэлснээр, өнгөрсөн пүрэв гарагт Холбооны мөрдөх товчооны тусгай төлөөлөгчид түүн дээр ирж уулзсан байна. Тэд үүссэн аюул занал шийдэгдэх хүртэл зорчих хөдөлгөөн хийхгүй байхыг зөвлөсөн бөгөөд хэрэв зорчихоор бол агентлагт урьдчилан мэдэгдэх шаардлагатайг сануулжээ.
Энэхүү шинэ сэрэмжлүүлэг нь 2023 онд Паннуны амь насыг хөнөөхөөр хуйвалдсан хэргээр Энэтхэгийн иргэнд холбогдох ялыг энэ оны сүүлээр оноох гэж байгаа цаг үед гарч байна.
