Дэлхий даяар түгээмэл болсон танилцах аппликейшн болох Tinder хиймэл оюун ухаанаар (AI) бүтээгдсэн хуурамч профайлыг илрүүлэх зорилгоор шинэ арга хэмжээ авч байна. Тус компани хэрэглэгчдийг өөрсдийгөө бодит хүн гэдгийг батлахын тулд нүдний сканнер ашиглахыг шаардаж эхэлжээ.
Тиндерийн зүгээс энэхүү шинэчлэлийг хийж байгаагийн гол шалтгаан нь AI технологийн хөгжлөөс үүдэлтэйгээр хуурамч профайлын тоо эрс нэмэгдсэнтэй холбоотой юм. Хуурамч профайлууд нь ихэвчлэн залилан мэхлэх, хувийн мэдээлэл хулгайлах зэрэг зорилготой байдаг. Тиймээс хэрэглэгчдийн аюулгүй байдлыг хангах, аппликейшны итгэлийг нэмэгдүүлэх үүднээс ийм арга хэмжээ авч байгаа аж.
Нүдний сканнердах технологи нь хүний нүдний торлог бүрхэвчийн өвөрмөц хэв маягийг ашиглан тухайн хүнийг баталгаажуулдаг. Энэ нь хурууны хээ уншуулахтай төстэй бөгөөд маш нарийвчлалтай арга гэж үздэг. Хэрэглэгчид аппликейшнд бүртгүүлэх эсвэл профайлаа баталгаажуулахдаа нүдний сканнердах шаардлагатай болно.
Тиндерийн зүгээс энэхүү шинэчлэлт нь эхний ээлжинд хэд хэдэн улсад туршилтын журмаар хэрэгжиж байгаа бөгөөд амжилттай болсон тохиолдолд дэлхий даяар бүх хэрэглэгчдэд нэвтрүүлэхээр төлөвлөж байгаа аж. Энэ нь залуучууд бидний хувьд онлайн танилцах орчны аюулгүй байдлыг сайжруулах чухал алхам болж байна.
