Америкийн алдарт Saturday Night Live (SNL) хошин шоуны тайзнаа Холливудын жүжигчин Уилл Феррелл, Red Hot Chili Peppers хамтлагийн бөмбөрчин Чад Смит нар ээлжит “давхар дүр”-ийн тоглолтоо хийж олныг хөгжөөв. Уилл Феррелл бол дэлхий дахинд “Elf”, “Anchorman”, “Step Brothers” зэрэг киногоороо танигдсан, комеди төрлийн жүжигчин юм. Red Hot Chili Peppers бол дэлхийн хамгийн алдартай рок хамтлагуудын нэг бөгөөд Чад Смит нь хамтлагийн гол гишүүдийн нэг билээ.
Тэдний гадаад төрхийн ижилсэл нь олон жилийн турш хүмүүсийн анхаарлыг татаж, янз бүрийн хошин тоглолт, ярилцлагын сэдэв болж байсан. Энэ удаагийн SNL-ийн үеэр Уилл Феррелл өөрийн монолог яриагаа эхлүүлэх гэж байтал Чад Смит тайзан дээр гарч ирэн жүжигчний яриаг тасалдуулж, хоорондоо хэн нь жинхэнэ Уилл Феррелл болох талаар маргаан үүсгэсэн нь үзэгчдийн инээдийг хүргэсэн байна.
Уг үзэгдэл нь тэдний олон жилийн хошин харилцааны нэг хэсэг бөгөөд үзэгчдэд гэнэтийн бэлэг болж чадсан юм. Феррелл, Смит нарын хоорондын энэ мэтчилэн хошин тоглолтууд нь тэднийг улам бүр алдартай болгож, фэнүүдийнх нь тоог нэмэгдүүлсээр байна.
