Франц улсын өмнөд хэсэгт орших Карпентрас хотод даваа гарагт хоёр болон дөрвөн настай хоёр хүүхэд машинд түгжигдсэний улмаас амиа алдсан хэрэг гарсан байна.
Орон нутгийн прокурорын газраас гаргасан анхны дүгнэлтээр, ах дүү хоёр гэр бүлийнхээ автомашинд санамсаргүй байдлаар түгжигдсэн болох нь тогтоогджээ. Тухайн үед машин гэр бүлийн байшингийнхаа үүдний хэсэгт зогсоол дээр байсан байна.
Хүүхдүүдийг ээж нь олсон бөгөөд яаралтай тусламжийн албаныхан ирж амийг нь аврахаар оролдсон ч харамсалтай нь тэднийг аварч чадаагүй байна. Одоогоор прокурорын газраас уг хэргийн мөрөөр урьдчилсан шалгалтын ажиллагааг эхлүүлжээ.
