Австралийн эрх баригчид хиймэл оюуны (AI) загваруудыг сургах боломжийг олгох зорилгоор тус улсын зохиогчийн эрхийн хуульд өөрчлөлт оруулах асуудлыг хэлэлцэж байна. Үүнтэй холбогдуулан OpenAI, Anthropic зэрэг технологийн томоохон компаниуд холбооны засгийн газарт лобби хийж байгаа аж.
Хэрэв эдгээр технологийн аваргууд ялалт байгуулбал урлагийн салбарт сүйрэл авчирч болзошгүйг хөгжмийн салбарынхан анхааруулав. Тухайлбал, Австралийн дуу бичлэгийн холбооны (ARIA) гүйцэтгэх захирал Аннабелл Херд 10-р сард хэлэхдээ, том AI компаниудын санал болгож буй замаар явбал хөгжмийн салбарт асар их хохирол учирч, Австрали улс дэлхий даяар эрх эзэмшигчдийн дунд гадуурхагдах эрсдэлтэйг сануулжээ.
Улс төрийн эргэлзээ ба байр суурь
Өнгөрсөн 7-р сард Австралийн Ерөнхий сайд Энтони Албаниз технологийн компаниуд зохиогчийн эрхээр хамгаалагдсан бүтээлийг зөвшөөрөлгүй, нэрийг нь дурдалгүй, нөхөн төлбөргүйгээр ашиглах боломжгүй хэмээн мэдэгдэж байв. Гэвч 10-р сарын 13-нд парламентын хиймэл оюуны хорооны хамтран даргалагч Жо Бриски, Жоно Даниам нар одоогийн зохиогчийн эрхийн хууль хангалтгүй байгаа тул шинэчлэл хийхгүй бол уран бүтээлчид AI-ийн эрин үед боломжоо алдаж магадгүй гэсэн байр суурь илэрхийлсэн юм.
Херд уг мэдэгдлийг буруу гэж үзэж байгаагаа илэрхийлээд, Австралийн хууль уран бүтээлчдэд хяналт тавих боломж олгодог бөгөөд Америкийн томоохон AI компаниуд контентод хяналтгүй нэвтрэхээс сэргийлж буй цорын ганц хаалт гэж мэдэгдсэн байна.
Дэлхийн хөгжмийн байгууллагуудын хариу үйлдэл
Дэлхийн нийт арилжааны хөгжмийн 90 хувийг төлөөлдөг, Брюссельд төвтэй Олон улсын хөгжмийн хэвлэн нийтлэгчдийн холбооны (ICMP) ерөнхий захирал Жон Фелан энэхүү саналыг "асар том газар нутгийг булаан эзлэхтэй адил" хэмээн тодорхойлжээ. Тус холбоонд Universal Music Publishing Group, Sony Music Publishing, Warner Chappell Music, BMG зэрэг томоохон хэвлэн нийтлэгчид болон мянга мянган бие даасан хэвлэн нийтлэгчид багтдаг.
Феланы үзэж байгаагаар технологийн компаниуд дэлхийн дижитал хөгжмийг хиймэл оюуны сургалтад ашиглахаар төлөвлөж байгаа бөгөөд үүнд санал болгож буй татгалзах (opt-out) механизм нь ажиллах боломжгүй, хууль эрх зүй болон арилжааны хувьд асар их хор хөнөөлтэй ажээ.
