Хиймэл оюун ухаан (AI) хөгжүүлэлтийн төлөөх дэлхийн өрсөлдөөн өдгөө АНУ болон Хятад гэсэн хоёр их гүрний тулаан болон хувирчээ. Энэхүү өрсөлдөөнд ховор металлын нөөц, их өгөгдөл (big data) болон технологийн зохицуулалтын дүрэм журам голлох байр суурийг эзэлж байна.
Бразилын Ерөнхийлөгч Лула да Силвагийн гадаад бодлогын ахлах зөвлөх, тус улсын Гадаад хэрэг, Батлан хамгаалахын сайд асан Селсо Аморим Рио-де-Жанейро хотноо болсон олон улсын аюулгүй байдлын чуулганы үеэр энэ талаар байр сууриа илэрхийлжээ. Түүний үзэж буйгаар, Латин Америк болон Европ тив энэхүү технологийн их өрсөлдөөнд ямар ч нөлөөгүй, зүгээр л хөндлөнгийн ажиглагчид болж үлдсэн байна.
Өдгөө технологийн салбарт АНУ болон БНХАУ-ын хооронд үүсээд буй өрсөлдөөн нь зөвхөн программ хангамж бүтээхээр хязгаарлагдахгүй, харин дэлхийн эдийн засаг, аюулгүй байдлын салбарт хэн нь ноёрхох вэ гэдгийг шийдэх гол хүчин зүйл болоод байна. Аморим хэлэхдээ, "Бид энэ технологийн эрин үед өөрсдийн байр сууриа тодорхойлж чадахгүй бол дэлхийн бодлогын гадна үлдэх эрсдэлтэй" гэдгийг анхааруулсан юм.
Европын Холбоо нь хиймэл оюун ухааныг зохицуулах чиглэлээр дэлхийд анхдагч хууль эрх зүйн орчныг бүрдүүлж байгаа ч технологийн хөгжлийн хурдаараа АНУ, Хятад хоёрыг гүйцэхэд хүндрэлтэй байна. Харин Латин Америкийн хувьд дэд бүтэц болон хөрөнгө оруулалтын дутагдлаас болж энэхүү уралдаанд хоцрогдож байгаа нь бүс нутгийн ирээдүйн хөгжилд сөргөөр нөлөөлж болзошгүй юм.
Технологийн энэхүү хоёр туйлт систем нь дэлхий даяар геополитикийн шинэ хуваагдлыг бий болгож магадгүй байна. Монгол зэрэг хөгжиж буй орнуудын хувьд энэхүү технологийн дайн нь зөвхөн гадны асуудал биш, харин ирээдүйн эдийн засгийн тусгаар тогтнол болон дижитал аюулгүй байдалтай шууд холбоотой сэдэв болон хувирч байна.
