Биткойны програм хангамжийн Breez компани хиймэл оюуны код бичих агентууд (AI coding agents) олон нийтийн хэрэглээнд нэвтэрснээс хойш өөрсдийнх нь хөгжүүлэгчийн хэрэгслийн эрэлт эрс нэмэгдсэнийг мэдэгдлээ. Тус компанийн мэдээлснээр аппликейшндээ биткойн төлбөр нэгтгэх хамтын ажиллагааны хүсэлт ойролцоогоор 14 дахин өссөн байна.
Breez энэхүү огцом өсөлтийг Anthropic компанийн гаргасан Claude Code хэрэгсэлтэй шууд холбон тайлбарлажээ. Уг хэрэгсэл нь 2025 оны 2-р сард туршилтын байдлаар анх гарч, улмаар гурван сарын дараа албан ёсоор нийтийн хүртээл болсон юм.
Хөгжүүлэгчид ба AI агентуудын хандалт
2025 оноос өмнө Breez-тэй хамтрах хүсэлт гаргагчид ихэвчлэн үнэнч биткойн сонирхогчид, крипто хөгжүүлэгчид болон биткойныг хөрөнгийн ангилал гэж үздэг финтек компаниуд гэсэн гурван бүлэгт хуваагддаг байжээ. Харин Claude Code гарснаас хойш биткойны туршлагагүй эсвэл маш бага мэдлэгтэй олон хөгжүүлэгч хандаж эхэлсэн байна. Тухайлбал фитнесс апп, хэрэглэгчид хоорондоо мөнгө илгээдэг чатын апп, аялагчдад зориулсан eSIM үйлчилгээ болон мөөг таних аппликейшний багуудаас хүсэлт иржээ.
Уламжлалт төлбөрийн систем холбох, тэр дундаа банкны данс нээх болон хил дамнасан шилжүүлэг тохируулахад хэдэн долоо хоног эсвэл сар шаардагддаг бол өөрсдийнх нь SDK-г хэдхэн минутын дотор ажиллуулах боломжтой тул хөгжүүлэгчид хурдыг чухалчлан биткойныг сонгож байгааг Breez онцолсон байна.
Биткойныг яагаад хиймэл оюун сонгож байна вэ?
Хамгийн сонирхолтой нь ирж буй хүсэлтүүдийн өсөн нэмэгдэж буй хувь нь хүнээс биш, харин тухайн компаниудын нэвтрүүлсэн хиймэл оюуны код бичих автомат агентуудаас шууд ирж байгаа аж.
Биткойн нь ямар нэгэн зөвшөөрөл шаарддаггүй (permissionless) учир хиймэл оюуны агентууд үүнийг илүүд үзэж байна гэж Breez үзэж байна. AI агент нь дэлхийн өнцөг булан бүрийн хэрэглэгчдэд зориулан банкны данс нээх, бичиг баримт баталгаажуулах эсвэл маягт бөглөх шаардлагагүйгээр апп бүтээж, төлбөрийн системийг нь шууд тохируулах боломжтой юм. Энэ талаар тус компани “Биткойны хувьд түүний эзэмшигч болон хэрэглэгчийн код нь ДНХ-ийн сууриудаас бүтсэн үү, эсвэл нейрон сүлжээний жингүүдээс тогтсон уу гэдэг нь огт хамаагүй” хэмээн блогтоо бичжээ.
Энэхүү хатуу хяналт шалгуургүй байдал нь хэрэглэгчээ баталгаажуулахыг шаарддаг санхүүгийн зохицуулагчдын анхаарлыг татсаар ирсэн билээ. Breez компани Bitcoin Spark протокол дээр суурилсан хамгийн сүүлийн үеийн SDK хувилбар нь энэхүү нэмэгдсэн ачааллыг ямар ч асуудалгүй даван гарч байгааг дурдсан юм. Түүнчлэн хөрөнгө оруулагч Марк Андриссений 2011 оны “Програм хангамж дэлхийг залгиж байна” гэсэн эсээг дурдаад, өдгөө хиймэл оюун програм хангамжийг залгиж байна хэмээн дүгнэж, биткойны гүйцэтгэх үүргийг цахилгааны залгуур, далайн ёроолын кабель зэрэг суурь дэд бүтэцтэй зүйрлэжээ.
