Дэлхийн улс төрийн тавцан дээр хүчтэй тоглогчдын нэг болох Хятад улс АНУ болон Европын холбооны харилцаа улам бүр хурцдаж буй нөхцөлд Европын орнуудтай харилцаагаа бэхжүүлэхэд анхаарлаа хандуулж байна. Германы DW агентлагийн мэдээлснээр Бээжингийн зүгээс ирээдүйн олон туйлт дэлхийн дэг журмыг бий болгох зорилгоор Европын холбоотнуудыг эрэлхийлж байгаа аж.
Олон улсын шинжээчдийн үзэж байгаагаар АНУ-ын дотоод улс төрийн тогтворгүй байдал, Европын орнуудтай харилцах харилцааны зөрчил нь Хятад улсад Европын орнуудтай харилцаагаа сайжруулах боломжийг олгож байна. Хятад улс эдийн засгийн хүч чадлаа ашиглан Европын орнуудад хөрөнгө оруулалт хийж, худалдааны хамтын ажиллагаагаа өргөжүүлж, улмаар улс төрийн нөлөөгөө нэмэгдүүлэхийг зорьж байна.
Гэсэн хэдий ч, Европын орнууд Хятадтай харилцах харилцаандаа болгоомжтой хандаж байна. Хятадын хүний эрхийн асуудал, худалдааны шударга бус практик, геополитикийн амбиц зэрэг нь Европын улс төрчдийн санааг зовоож байна. Тиймээс Европын орнууд Хятадтай харилцах харилцаандаа тэнцвэртэй байр суурь баримтлахыг хичээж, АНУ-тай тогтоосон уламжлалт холбоогоо хадгалахын зэрэгцээ Хятадтай эдийн засгийн харилцаагаа хөгжүүлэхийг эрмэлзэж байна.
Олон улсын харилцааны шинжээч Ц.Мөнхтуяагийн хэлснээр "Хятад улс Европын орнуудтай харилцаагаа бэхжүүлэх нь Монгол Улсын гадаад бодлогод шууд нөлөөлөхгүй ч, бүс нутгийн геополитикийн өөрчлөлтөд анхаарал хандуулах нь чухал юм. Монгол Улс хоёр хөрштэйгөө тэнцвэртэй харилцаатай байх бодлого баримталж, үндэсний аюулгүй байдлаа хангахын төлөө ажиллах ёстой" гэв.
