Европын холбооны Гадаад хэрэг, аюулгүй байдлын бодлого хариуцсан дээд төлөөлөгч Кая Каллас Бээжингийн эсрэг авч хэрэгжүүлэх арга хэмжээг чангатгах талаар мэдэгдэл хийлээ. Тэрээр Люксембургт болсон ЕХ-ны 27 орны Гадаад хэргийн сайд нарын уулзалтын дараа хэвлэлийнхэнд мэдээлэхдээ, Хятадын цэргийн байгууллагууд Оросын цэргийн албан хаагчдыг Украинд тулалдах бэлтгэлд сургаж байгааг нотлох баримтууд байгааг онцолсон байна.
Энэхүү мэдээлэл нь Брюссель болон Бээжингийн хоорондох харилцааг улам бүр хурцатгах төлөвтэй байна. Европын холбоо одоогийн байдлаар энэ асуудлын үр дагаврыг нарийвчлан судалж байгаа бөгөөд Хятадын зарим аж ахуйн нэгж, байгууллагуудад хориг арга хэмжээ авахаар тохиролцсон гэдгээ Кая Каллас мэдэгдлээ. Хэдийгээр Хятад улс өөрсдийгөө Украины дайнд төвийг сахисан байр суурьтай гэж мэдэгддэг ч, Оросын цэргийн хүчин чадлыг нэмэгдүүлэхэд ийнхүү шууд оролцож байгаа нь барууны орнуудын дургүйцлийг хүргэж байна.
Ажиглагчдын үзэж байгаагаар, хэрэв Хятад улс Оросын армийг сургаж, цэргийн дэмжлэг үзүүлж байгаа нь бүрэн нотлогдвол энэ нь Европын холбооны зүгээс Бээжинд авч хэрэгжүүлэх эдийн засгийн болон дипломат хориг арга хэмжээг шинэ шатанд гаргах юм. Одоогоор Хятадын тал энэ мэдэгдэлтэй холбогдуулан албан ёсны хариу өгөөгүй байгаа ч, олон улсын геополитикийн тавцанд томоохон өөрчлөлт гарах эхлэл тавигдаж байна.
