Хөлбөмбөгийн Дэлхийн аварга шалгаруулах тэмцээн бол зөвхөн спортын баяр биш, харин дэлхийн эдийн засагт ч нөлөөлөхүйц томоохон үйл явдал юм. MarketWatch-ийн мэдээлснээр, хөлбөмбөгийн багийн ялагдал нь зөвхөн хөгжөөн дэмжигчдийн сэтгэл санааг унагаагаад зогсохгүй, тухайн улсын хөрөнгийн зах зээлийн үзүүлэлтэд хүртэл сөргөөр нөлөөлдөг сонирхолтой зүй тогтол ажиглагджээ.
Эдийн засагчдын судалгаагаар, үндэсний шигшээ баг нь тэмцээнээс хасагдсаны дараах өдрүүдэд тухайн улсын хувьцааны индексүүд уналтад орох хандлагатай байдаг байна. Үүнийг мэргэжилтнүүд “сэтгэл зүйн хүчин зүйл”-тэй холбон тайлбарладаг. Хөлбөмбөг бол олон сая хүний хувьд үндэсний бахархал бөгөөд багийн ялагдал нь ард иргэдийн өөдрөг үзлийг бууруулж, энэ нь улмаар хөрөнгө оруулагчдын шийдвэрт нөлөөлдөг ажээ. Хөрөнгө оруулагчид ч гэсэн хүн тул сэтгэл хөдлөлөөсөө бүрэн ангид байж чаддаггүй байна.
Ялангуяа, хөлбөмбөгөөр амьсгалдаг орнуудад энэ нөлөө илүү хүчтэй ажиглагддаг. Баг нь ялагдсан үед хөрөнгө оруулагчид илүү болгоомжтой болж, эрсдэлээс зайлсхийх хандлагатай болдог нь хувьцааны арилжааны хэмжээ буурахад хүргэдэг байна. Мөн тэмцээний үеэр ажлын бүтээмж буурах, ажлын байран дахь анхаарал сарних зэрэг нь эдийн засгийн идэвхжилд тодорхой хэмжээгээр саад учруулдаг болохыг судалгаанууд баталдаг.
Хэдийгээр хөлбөмбөгийн ялагдал нь эдийн засгийн суурь үзүүлэлтүүдийг шууд өөрчлөхгүй ч, хөрөнгийн зах зээлийн богино хугацааны хэлбэлзэлд хүчтэй нөлөөлдөг нь хөрөнгө оруулагчдын хувьд анхаарах ёстой зүйл юм. Тиймээс хэрэв та олон улсын зах зээлд хөрөнгө оруулдаг бол, хөлбөмбөгийн Дэлхийн аваргын үеэр зөвхөн талбай дээрх тоглолтыг бус, зах зээлийн сэтгэл зүйн хэлбэлзлийг ч давхар ажиглах хэрэгтэй болох нь ээ.
Энэхүү үзэгдэл нь хөрөнгийн зах зээл гэдэг зөвхөн тоо баримт, график дээр суурилдаггүй, харин хүмүүсийн сэтгэл зүй, итгэл үнэмшилтэй салшгүй холбоотой болохыг дахин нэг удаа баталж байна.