НҮБ-ын төв байранд Цөмийн зэвсгийг үл дэлгэрүүлэх тухай гэрээний чухал уулзалт эхэлж, дэлхий дахинд цөмийн зэвсгийн уралдаан дахин гаарч болзошгүй байгаа талаар анхааруулга хүргэж байна. Энэхүү гэрээ нь цөмийн зэвсгийг хяналтандаа байлгах, тархаахгүй байх гол үндэс суурь гэж үздэг.
2022 онд болсон өмнөх хэлэлцээрийн үеэр НҮБ-ын Ерөнхий нарийн бичгийн дарга Антонио Гутерриш хүн төрөлхтөн цөмийн зэвсгийн сүйрлээс ердөө ганц буруу ойлголт, ганц алдаатай тооцоололтоос л хамааралтай байгааг анхааруулж байсан. Тэрээр даваа гарагт хэлсэн үгэндээ цөмийн зэвсгийн “жолоодогч хүчин зүйлс” улам бүр нэмэгдэж байгааг онцоллоо.
Олон улсын шинжээчид Орос, Хятад, АНУ зэрэг цөмийн зэвсэгтэй орнуудын хооронд үүсээд буй харилцааны хурцадмал байдал, мөн Украин дахь дайн нь цөмийн зэвсгийн аюулыг улам бүр нэмэгдүүлж болзошгүй гэж үзэж байна. Түүнчлэн Иран зэрэг орнуудын цөмийн хөтөлбөрүүд нь олон улсын санаа зовнилыг төрүүлсээр байна.
Энэхүү уулзалтаар талууд цөмийн зэвсгийг үл дэлгэрүүлэх гэрээний хэрэгжилтийг сайжруулах, цөмийн зэвсгийн аюулыг бууруулах, энх тайвныг бэхжүүлэх арга замыг эрэлхийлэх зорилготой юм. Залуу үе бидний хувьд дэлхий дахинд энх тайван, аюулгүй байдлыг хангах нь нэн чухал тул олон улсын хамтын ажиллагааг дэмжиж, цөмийн зэвсгийн эсрэг дуу хоолойгоо нэгтгэх нь зүйтэй.
