Швейцар улсад өнгөрөгч амралтын өдрүүдэд болсон бүх нийтийн санал асуулгаар тус улсын хүн амыг 10 саяас хэтрүүлэхгүй байх тухай маргаантай саналыг иргэд эсэргүүцлээ. Энэхүү санаачилгыг Швейцарын баруун жигүүрийн “Швейцарын Ардын нам” (SVP) гаргасан бөгөөд гол зорилго нь цагаачлалыг хязгаарлах, улмаар хүн амын хэт өсөлтөөс үүдэлтэй нийгмийн үйлчилгээний ачааллыг бууруулах байв.
Тус намын зүгээс хүн амын тоог 10 саяар хязгаарлах нь байгаль орчин, дэд бүтэц болон орон сууцны хүрэлцээнд эерэг нөлөөтэй гэж үзэж байсан юм. Гэвч Швейцарын засгийн газар болон парламентын олонх энэхүү саналыг эдийн засгийн хувьд эрсдэлтэй, улс орны нээлттэй байдал болон хөдөлмөрийн зах зээлд сөргөөр нөлөөлнө хэмээн үзэж, иргэдээ эсрэг санал өгөхийг уриалжээ. Санал асуулгын дүнгээр иргэдийн дийлэнх нь баруун жигүүрийн энэхүү хатуу бодлогыг дэмжихээс татгалзсан байна.
Швейцар улс нь Европын холбооны гишүүн биш ч гэсэн эдийн засгийн хувьд тус холбоотой нягт уялдаатай байдаг. Иймд хүн амын тоонд албан ёсны хязгаар тогтоох нь олон улсын гэрээ хэлэлцээрүүд, ялангуяа Европын холбоотой байгуулсан чөлөөт хөдөлгөөний гэрээнд сөргөөр нөлөөлөх байсныг шинжээчид онцолж байна.
Тус улсын хүн ам одоогоор 9 сая орчим байгаа бөгөөд хүн ам зүйн өсөлт нь эдийн засгийн хөгжилд чухал үүрэгтэй гэж үздэг. Энэ удаагийн санал асуулгын дүн нь Швейцарын нийгэм дэх цагаачлал болон хүн амын өсөлтийн талаарх маргаан үргэлжилсээр байгааг харууллаа.
