Хятадын удирдагч Ши Жиньпин Хойд Солонгост хийх айлчлалаа эхлүүлж байгаа нь олон улсын анхаарлын төвд байна. Энэхүү айлчлал нь зөвхөн хоёр орны уламжлалт найрамдлыг бататгах зорилготой төдийгүй, геополитикийн нарийн тооцоо бүхий алхам гэж ажиглагчид дүгнэж байна.
Сүүлийн жилүүдэд Хойд Солонгосын цөмийн хөтөлбөр болон АНУ-тай явуулж буй хэлэлцээрийн улмаас тус улсын нөхцөл байдал тогтворгүй байгаа билээ. БНХАУ-ын хувьд Хойд Солонгос бол стратегийн чухал ач холбогдолтой түнш төдийгүй, АНУ-ын бүс нутаг дахь нөлөөг тэнцвэржүүлэхэд ашиглаж болох гол “хөзөр” юм. Бээжин Пхеньяныг бүрэн хяналтдаа байлгахыг хүсэж байгаа ч, Хойд Солонгосын урьдчилан таамаглахын аргагүй үйлдэл нь Хятадын дипломат бодлогод томоохон сорилт болсоор ирсэн.
Ши Жиньпиний энэ удаагийн айлчлал нь АНУ-Хятадын худалдааны дайн болон олон улсын тавцан дахь өрсөлдөөн ид өрнөж буй үед тохиож байгаагаараа онцлогтой. Бээжин өөрийн нөлөөг дахин нотолж, бүс нутгийн аюулгүй байдлын асуудалд гол тоглогч хэвээр үлдэхийн тулд Пхеньянтай харилцаагаа сайжруулах нь чухал алхам юм. Хойд Солонгосын удирдагч Ким Жон Уны хувьд ч Хятадтай харилцаагаа бэхжүүлэх нь эдийн засгийн хориг арга хэмжээний эсрэг дэмжлэг авах, цаашлаад АНУ-тай хийх хэлэлцээрт илүү давуу тал олж авахад нь тус дөхөм болно.
Дэлхий нийт энэхүү айлчлалыг зүгээр нэг найрамдлын бэлгэдэл гэхээс илүүтэйгээр, Ази тив дэх хүчний тэнцвэрт байдлыг өөрчлөх гэсэн оролдлого гэж харж байна. Бээжин Пхеньяныг хэрхэн “зөөлрүүлж”, өөрийн ашиг сонирхолд нийцүүлэх вэ гэдэг нь ирэх өдрүүдийн дипломат харилцааны гол сэдэв байх болно.
