Энэтхэгийн засгийн газар эрчим хүчний үнэ өсөж буйтай холбоотойгоор иргэдээ аль болох шатахуун хэмнэхийг уриалж байна. Ерөнхий сайд Нарендра Модигийн хэлснээр энэ нь ОХУ-Украины дайнаас үүдэлтэй эдийн засгийн хүндрэлээс улс орноо хамгаалах арга хэмжээ аж. Гэвч энгийн иргэд үнэ хэт өндөр байгаагаас болж хэдийнэ хэмнэлтийн горимд шилжсэнээ хэлж, нэмэлт хэмнэлт хийх боломжгүй болсноо илэрхийлж байна.
Энэтхэг нь эрчим хүчний хэрэгцээ ихтэй, импортоос хамааралтай орон. Дэлхий даяар шатахууны үнэ өсөж байгаа нь Энэтхэгийн эдийн засагт шууд нөлөөлж, инфляцийг өсгөж байна. Засгийн газраас иргэддээ хувийн тээврийн хэрэгслийн оронд нийтийн тээврээр зорчих, цахилгаан хэрэгслийг хэмнэлттэй ашиглах зэрэг зөвлөмж өгч байгаа ч иргэд амьжиргааны түвшин доогуур байгаагаа хэлж, засгийн газрыг бодлогоо эргэн харахыг шаардаж байна.
Энэтхэгийн эдийн засаг хурдацтай хөгжиж байгаа хэдий ч хүн амын дийлэнх нь ядуу амьдардаг. Шатахууны үнийн өсөлт нь хүнсний бүтээгдэхүүн, тээврийн зардал зэрэгт нөлөөлж, ядуу иргэдийн амьдралыг улам хүндрүүлж байна. Зарим шинжээчдийн үзэж байгаагаар засгийн газар шатахууны татварыг бууруулах, сэргээгдэх эрчим хүчийг дэмжих зэрэг арга хэмжээ авах шаардлагатай гэнэ.
