Технологийн салбарын залуу бизнес эрхлэгч Фиби Гэйтс болон түүний Стэнфордын их сургуулийн дотуур байрны өрөөний анд София Кианни нарын үүсгэн байгуулсан Phia нэртэй худалдааны стартап одоо хэл аманд өртөөд байна. Энэхүү хөтөчийн өргөтгөл (browser extension) нь хэрэглэгчдэд барааг хямдралтай үнээр олоход туслах зорилготой байсан ч, бодит байдал дээр бусад сувгийн харьяалагдах шимтгэлийг өөртөө авдаг байсан гэх сэжиг төрүүлээд байна.
Асуудал юунаас эхлэв?
Bloomberg агентлагийн хийсэн мөрдлөгөөр уг өргөтгөл нь худалдан авалт хийх үед хэрэглэгчийн зөвшөөрөлгүйгээр нууцаар шинэ цонх нээж, өөрийн аффилиэйт холбоосыг (affiliate link) ачаалдаг болохыг илрүүлжээ. Энэ нь хэрэглэгч тухайн барааг Phia-аар дамжуулан олоогүй байсан ч, тухайн худалдан авалтын шимтгэл нь Phia-д очих боломжийг бүрдүүлж байсан аж. Энэхүү үйлдлийг технологийн салбарт «cookie stuffing» буюу шимтгэл залилах арга гэж нэрлэдэг.
Bloomberg, Capital One Shopping болон судлаач Бен Эделман нарын хийсэн тусдаа туршилтуудаар Phia нь Nordstrom зэрэг томоохон сайтууд руу орох үед өөр сувгийн илгээсэн холбоосыг өөрийнхөөрөө сольж байсан нь тогтоогджээ. Үүний улмаас Impact.com платформ Phia-г өөрийн сүлжээнээс түдгэлзүүлсэн байна.
Компанийн тайлбар
Нийгмийн сүлжээнд энэ талаарх шүүмжлэл өрнөж, зарим хүмүүс тус стартапыг буруутгаж байхад зарим нь үүсгэн байгуулагчдыг өмгөөлж байна. Phia компанийн зүгээс уг асуудлыг санаатай бизнес гэхээсээ илүүтэй програм хангамжийн алдаа гэж тайлбарлажээ. Тэдний хэвлэлийн төлөөлөгчийн мэдээлснээр, кодын шинэ хувилбарт гарсан алдаанаас болж ийм нөхцөл байдал үүссэн бөгөөд баг нь уг алдааг засахаар шөнөжин ажилласан байна. Bloomberg-ийн дахин хийсэн шалгалтаар уг өргөтгөл нь одоо худалдан авалтын шимтгэлийг автоматаар өөртөө шилжүүлэхээ больсон нь тогтоогджээ.
