Энэ онд амжилт дүүрэн яваа Америкийн дуучин, реппер Дон Толивер (Don Toliver) алдарт реппер Дрэйктэй хамтран ажилласан талаараа сэтгэгдлээ хуваалцлаа. Тэд хамтран “Cold Shoulder” болон “Solar Eclipse” хэмээх хоёр шинэ дуу гаргасан бөгөөд эдгээр нь Дрэйкийн 10 дугаар сарын 2-нд цацагдсан “HABIBTI (FOMO)” цомгийн делюкс хувилбарт багтжээ.
Эдгээр дуунууд анх өнгөрсөн 9 дүгээр сард Дрэйкийн “FOMO” шууд дамжуулалтын үеэр цацагдаж байсан юм. “Solar Eclipse” дуунд Элла Лэнглигийн Billboard Hot 100 жагсаалтад дээд амжилт тогтоосон “Choosin’ Texas” дууны хэсгээс ашигласан байна.
Хьюстон хотоос гаралтай, өдгөө 31 настай Дон Толивер Лос-Анжелес хотод болсон Грэммийн музейн ярилцлагын үеэр Дрэйкийн уран бүтээлийг олон жил шимтэн сонсож өссөнөө онцолжээ. Тэрбээр “Comeback Season болон So Far Gone зэрэг цомгуудыг нь сонсож өссөн. Дрэйктэй хамтарсан энэ уран бүтээл, ялангуяа ‘Solar Eclipse’ дуу нь бид хоёрын хамтралаас хүсэж болох бүх зүйл минь байлаа. Бүх зүйл төгс, яг байх ёстойгоороо болж өнгөрсөн” хэмээн ярьсан байна.
Толивер энэ оны 1 дүгээр сард гаргасан OCTANE цомгоороо Billboard 200 жагсаалтыг анх удаа тэргүүлсэн бөгөөд уг цомгийн бүх 18 дуу нь Hot 100 жагсаалтад багтсан юм. Мөн тэрбээр Yeat-тэй хамтарсан “Griddle” дуугаараа ч амжилт үзүүлээд байна. Тэрбээр Хойд Америкийн ордонуудыг хамарсан “Octane World Tour” аялан тоглолтоо хийсэн бөгөөд 8 дугаар сард Торонто хотод болсон тоглолтод Дрэйк гэнэтийн зочноор оролцож байв.
Дон Толивер одоогоор OCTANE цомгийнхоо үргэлжлэл болох NITROUS нэртэй шинэ төсөл дээрээ үргэлжлүүлэн ажиллаж байна.
