Зөөврийн компьютер худалдан авагчдын хувьд батарейн ажиллах хугацаа хамгийн чухал хүчин зүйлсийн нэг болохыг CNET-ийн 2025 оны судалгаа харуулсан байдаг. Энэ хүрээнд Mashable хэвлэлээс зөөврийн компьютеруудын цэнэгээ барих чадварыг стандарт видео тасралтгүй тоглуулах туршилтаар шалгаж иржээ.
Үзүүлэлтийн огцом өсөлт
Сүүлийн үед зөөврийн компьютеруудын батарейн ажиллах хугацаа эрс сайжирчээ. Тэр дундаа 2024 онд туршигдсан PC загваруудын дундаас ердөө нэг нь л 20 цагаас дээш ажиллаж байсан бол сүүлийн хоёр жилд гурван загвар 30 цагийн босгыг давж, хоёр нь 24 цагаас дээш, өөр 10 загвар хамгийн багадаа 20 цаг цэнэгээ барьсан байна.
Туршилтад орсон 2024 оны PC загваруудын батарейн медиан хугацаа 12.5 цаг байсан бол энэ жилийн загваруудынх 18.5 цаг болж, 48 хувиар өсжээ. Энэхүү үсрэнгүй ахицад Qualcomm-ийн Snapdragon X цуврал болон Intel-ийн Panther Lake чипүүд голлох нөлөө үзүүлсэн байна. Нөгөө талд Apple 2020 онд өөрсдийн M цувралын чип рүү шилжсэнээр M1 MacBook Air өмнөх Intel загвараасаа 50 хувиар илүү буюу 18 цаг хүртэл ажиллах болсон юм. Дараагийн M2, M3, M4 болон M5 Pro, Air загварууд 21 цаг хүртэл ажиллаж байсан бол төсвийн шинэ загвар MacBook Neo ойролцоогоор 15 цаг ажиллажээ.
Чипийн архитектурын дэвшил
Батарейн ажиллах хугацаа ийнхүү уртассан нь зайны багтаамж томорсноос бус чипүүд улам жижгэрч, үр ашигтай болсонтой холбоотой гэж CNET-ийн шинжилгээнд дурджээ. Qualcomm-ийн Snapdragon X болон Apple-ийн M цувралын чипүүд нь хоёул ARM зааврын багцын архитектурт (ISA) суурилсан байдаг. ARM нь Intel болон AMD чипүүдийн уламжлалт x86 архитектураас илүү хялбар тул цахилгаан зарцуулалт багатай байдаг аж.
Туршилтын үр дүнгээр хамгийн өндөр үзүүлэлт үзүүлсэн төхөөрөмжөөр HP OmniBook 3 16 тодорсон бөгөөд видео тасралтгүй тоглуулах туршилтаар 40 цаг 14 минут ажиллаж дээд амжилт тогтоожээ.
