Мексик улсад 2024 онд дахин тархаж эхэлсэн мах иддэг шимэгч ялааны улмаас хүний өвчлөлийн тохиолдол огцом нэмэгдсээр байна. Мексикийн Эрүүл мэндийн яамны долдугаар сарын тайланд дурдсанаар, 2025 болон 2026 онд нийт 500 гаруй хүн энэхүү шимэгчээр халдварлажээ.
"Emerging Infectious Diseases" сэтгүүлд нийтлэгдсэн судалгаагаар 2025 оны дөрөвдүгээр сараас 2026 оны гуравдугаар сарын хооронд бүртгэгдсэн 200 гаруй тохиолдолд дүн шинжилгээ хийхэд халдварын тархалт эрчимжиж байгаа нь тогтоогдсон байна. Эдгээр тохиолдлын дунд зургаан хүн нас барсан бөгөөд тэдний дор хаяж нэг нь шууд энэхүү ялааны авгалдайн улмаас амиа алджээ.
Шинэ ертөнцийн шимэгч ялаа (NWS) нь урьд нь Мексик болон АНУ-д нутагшсан байсан юм. Эдгээр ялаа нь халуун цуст амьтад, тэр дундаа хүний шарх, үрэвсэлтэй эд эс, салст бүрхэвч болон биеийн нүхэнд олон зуун өндгөө шахдаг байна. Өндөгнөөс гарсан авгалдай нэг өдрийн дотор идэвхжиж, хохирогчийн амьд махыг шимэн иддэг аюултай шинж чанартай. Энэхүү шимэгч нь зөвхөн хүнд төдийгүй мал аж ахуйд маш их хохирол учруулдаг болохыг мэргэжилтнүүд анхааруулж байна.
