Шинэ мянганы эхэн үед анх гарч байсан eharmony болзооны платформ өнөөг хүртэл байр сууриа хадгалсаар байна. Энэхүү платформ нь зөвхөн гадаад үзэмж бус, хүний дотоод зан чанарт суурилсан тохироог чухалчилдаг онцлогтой. Гэсэн хэдий ч төлбөрийн өндөр үнэ болон хиймэл оюун ухаан түгсэнтэй холбоотойгоор хуурамч хаягууд олширсон зэрэг нь хэрэглэгчдийн шүүмжлэлийг дагуулж байна.
Зан чанарын тест ба нарийн шүүлтүүр
Богино хугацааны харилцаа хайгчдаас зайлсхийж, илүү нухацтай харилцаа хүсэж буй хүмүүст “eharmony”-ийн бүртгэлийн систем ихээхэн тусалдаг байна. Тус платформ анх христийн шашны болзооны сайт хэлбэрээр эхэлж байсан бөгөөд хэрэглэгчдийг өөрсдийн боловсруулсан зан чанарын асуулга бөглөхийг шаарддаг.
Reddit сүлжээний хэрэглэгчид энэхүү системийн нарийн шүүлтийг өндрөөр үнэлжээ. Тухайлбал, асуулгын хариултад үндэслэн гаргадаг тохирооны оноо (compatibility score) нь харилцаа эхлүүлэхэд тустай үзүүлэлт болдог байна. Нэгэн хэрэглэгч тус системээс 140 онооноос 126 гэсэн ховор өндөр тохироо авсан эмэгтэйтэйгээ холбогдож, жилийн дараа сүй тавьсан тухайгаа хуваалцжээ. Ерөнхийдөө 105-аас дээш оноо авах нь тун ховор тохиолддог байна.
Өндөр төлбөр ба захиалга цуцлахтай холбоотой гомдол
Харин хэрэглэгчдийн зүгээс хамгийн их гаргадаг гомдол нь үйлчилгээний үнэ юм. Платформын боломжуудыг бүрэн ашиглах, тэр дундаа бусдын зургийг харахын тулд заавал төлбөртэй гишүүнчлэл авдаг. Тус платформ нь Light, Plus, Unlimited гэсэн гурван төрлийн сонголттой ба сарын төлбөр нь хамгийн багадаа 15 ам.доллароос эхэлдэг байна. Энэ нь стандарт Netflix үйлчилгээнээс ч өндөр үнэтэй тусдаг.
Үүнээс гадна төлбөртэй гишүүнчлэлээ цуцлах процесс туйлын төвөгтэй, зарим тохиолдолд бүртгүүлснээс хойш 12 цагийн дотор ч цуцлахад хүндрэл үүсдэг, мөн төлбөр автоматаар сунгагддаг зэрэг асуудлууд хэрэглэгчдийг бухимдуулдаг байна. Гэхдээ платформ нь зарим үед гишүүнчлэлийн үнэдээ 50 хүртэлх хувийн хөнгөлөлт зарладаг ажээ.
