АНУ-ын Техас муж дата төвүүдийн өсөн нэмэгдэж буй эрэлт хэрэгцээнд хариу арга хэмжээ авч, цахилгаан сүлжээнд шинээр холбогдох үйл ажиллагааг түр хугацаагаар зогсоолоо. Тус муж нь өнгөрсөн хугацаанд өөрийгөө "хиймэл оюун ухааны хөгжлийн төв" хэмээн зарлаж байсан ч эрчим хүчний ачаалал хэтэрсний улмаас ийм шийдвэр гаргахад хүрсэн байна.
Шалгалтын ажиллагаа эхэллээ
Техас мужийн амбан захирагч Грег Эббот энэ сарын эхээр Техасын Нийтийн үйлчилгээний комисс болон цахилгаан сүлжээг хариуцагч ERCOT байгууллагад үүрэг өгчээ. Тэрээр дата төвүүдийн төслүүд нь орон нутгийн иргэд болон эрчим хүчний сүлжээнд хэрхэн нөлөөлөх талаар "цогц баталгаажуулалт, аудит" хийхийг шаардсан байна. Одоогийн байдлаар ERCOT-ийн сүлжээнд холбогдохоор хүлээгдэж буй бүх дата төвийн төсөлд энэхүү шалгалт хамаарна.
Эрчим хүчний эрэлт ба өрсөлдөөн
Техас муж нь хямд газар нутаг, харьцангуй элбэг эрчим хүчний нөөц, татварын хөнгөлөлт зэрэг бодлогоор дата төвүүдийг идэвхтэй татаж ирсэн. Энэхүү бодлого нь Техасыг АНУ-ын хамгийн том дата төвийн зах зээл болох Виржиниа мужийг гүйцэхэд ойртуулаад байсан юм. Гэвч эрчим хүчний сүлжээнд ирж буй ачаалал нэмэгдсэнтэй холбогдуулан дээрх хязгаарлалтыг тогтоосон байна.
ERCOT нь АНУ-ын бусад мужаас тусдаа бие даасан эрчим хүчний сүлжээгээр ажилладаг бөгөөд Техасын ихэнх хэсгийг хангадаг онцлогтой. Одоогийн байдлаар дата төвийн хөгжүүлэгчид өөрсдийн төслийн нөлөөллийн талаар илүү дэлгэрэнгүй мэдээлэл өгөх хүртэл шинээр сүлжээнд холбогдох боломжгүй болжээ.
