Дэлхий дахинд эмэгтэйчүүдийн дунд түгээмэл тохиолддог умайн хүзүүний хорт хавдраас урьдчилан сэргийлэх чиглэлээр томоохон ахиц гарлаа. BBC-ийн мэдээлснээр, 2008 онд сургуулийн насны охидыг хүний папиллома вирус буюу HPV-ийн эсрэг вакцинжуулалтад хамруулж эхэлснээс хойш тус өвчнөөр нас барах эрсдэл бараг үгүй болсон байна.
Эрдэмтдийн хийсэн шинэ судалгаагаар, вакцинжуулалтын хөтөлбөрт хамрагдсан бүлгийн охидын дунд умайн хүзүүний хорт хавдрын тохиолдол эрс багассан нь батлагджээ. Энэ нь нийгмийн эрүүл мэндийн салбарт гарсан хамгийн том ялалтуудын нэг гэж мэргэжилтнүүд дүгнэж байна. HPV вирус нь бэлгийн замаар дамждаг бөгөөд умайн хүзүүний хорт хавдар үүсгэх гол шалтгаан болдог. Вакцин нь уг вирусийн халдвараас сэргийлснээр ирээдүйд үүсэх хорт хавдрын эрсдэлийг үндсээр нь тасалж байгаа юм.
Судалгааны үр дүнгээс харахад, вакциныг эрт үед нь хийлгэх нь хамгийн өндөр үр дүнтэй байгаа бөгөөд олон зуун хүний амийг аварч чадсан байна. Энэхүү мэдээлэл нь зөвхөн охид гэлтгүй, ерөнхийдөө нийгмийн эрүүл мэндийн боловсрол, урьдчилан сэргийлэх үзлэг болон вакцинжуулалт ямар чухал болохыг дахин сануулж байна.
Монгол Улсын хувьд ч гэсэн умайн хүзүүний хорт хавдрын эсрэг вакцинжуулалтын хөтөлбөрүүд хэрэгжиж байгаа билээ. Шинжлэх ухааны энэхүү бодит үр дүн нь вакцинжуулалтад эргэлзэх шаардлагагүйг, харин ч энэ нь амьдралыг аврах хамгийн найдвартай арга гэдгийг нотолж байна. Залуус та бүхэн өөрийн эрүүл мэндэд анхаарч, шаардлагатай үзлэг оношилгоо, вакцинжуулалтад идэвхтэй хамрагдахыг уриалж байна.
