Хиймэл оюун ухаан (AI) технологийн салбарт эрчимтэй хөгжиж, ажлын байр болон өдөр тутмын амьдралд нэвтэрсээр байгаа хэдий ч олон нийтийн хандлага эсрэгээрээ сөрөг болж байна. АНУ-ын Gallup судалгааны байгууллагын гаргасан шинэ тайлангаас үзэхэд, хүмүүс хиймэл оюун ухааныг илүү сайн мэдэх болсон ч уг технологид итгэх итгэл нь буурч байгаа ажээ.
Ажлын байрны түгшүүр
Судалгаанд оролцогчдын дийлэнх нь хиймэл оюун ухаан ажлын байрыг үгүй хийнэ гэж эмээж байна. Gallup-ын мэдээлснээр, арван хүн тутмын найм нь ирэх арван жилийн хугацаанд хиймэл оюун ухаан олон ажлын байрыг цомхотгох болно гэж үзжээ. Хэдийгээр зарим ажил олгогчид уг технологи нь илүү олон хүн ажилд авахад түлхэц болно гэж мэдэгддэг ч, томоохон компаниуд ажлаас халах шийдвэр гаргахдаа хиймэл оюун ухааныг дурдаж байгаа нь ажилчдын дунд үл итгэх байдлыг нэмэгдүүлж байна.
Олон нийтийн хандлага өөрчлөгдөв
Хиймэл оюун ухааныг ашиг тустай гэж үздэг хүмүүсийн тоо буурсаар байна. 2024 болон 2025 оны байдлаар судалгаанд оролцогчдын 31 хувь нь уг технологи нь ашиг тусаасаа илүү хор хөнөөлтэй гэж үзэж байсан бол энэ жил энэ үзүүлэлт 39 хувьд хүрч өсжээ. Ялангуяа 18-29 насны залуучуудын дунд энэ үзүүлэлт 47 хувьтай байгаа нь анхаарал татаж байна. Хиймэл оюун ухаан илүү их ашиг тустай гэж үзсэн хүмүүсийн хувь өмнөх оны 12 хувиас 9 хувь хүртэл буурчээ.
Түүнчлэн, бизнесүүд хиймэл оюун ухааныг хариуцлагатай ашиглана гэдэгт итгэх хүмүүсийн тоо ердөө 27 хувьтай байна. Энэ нь өмнөх оны 31 хувиас буурсан үзүүлэлт юм. АНУ-ын Холбооны нөөцийн сангийн судалгаагаар ажилчдын 41 хувь нь ажлын байрандаа хиймэл оюун ухаан ашиглаж байгаа бол нийт хүн амын тал нь хувийн амьдралдаа уг технологийг ашиглаж байна. Хэдийгээр технологийн мэдлэг, ашиглалт нэмэгдэж байгаа ч энэ нь хүмүүсийн айдас, эргэлзээг арилгах бус харин ч уг технологийн хор уршгийг илүү танин мэдэхэд хүргэж байгаа нь судалгааны дүнгээс харагдаж байна.
