Интернэт хэрэглэгчдийн дунд танигдсан, шинжлэх ухааны мэдээлэл түгээгч Хэнк Грин саяхан өөрийн бүтээлүүддээ ChatGPT хиймэл оюуныг хэт их ашигласан гэх шүүмжлэлд өртөж, олон нийтээс уучлалт гуйлаа. Тэрээр өөрийн үүсгэн байгуулсан Complexly байгууллагын контентуудад хиймэл оюуныг ашигласан нь үзэгчдийн анхаарлыг татсан юм.
Асуудал “Ask Hank Anything” нэвтрүүлгийн үеэр хэлсэн “I appreciate the pushback” буюу “Эсэргүүцлийг үнэлж байна” гэх хэллэгээс эхэлжээ. Энэхүү өгүүлбэр нь ихэвчлэн хиймэл оюуны чатботуудын хэрэглэдэг хэллэгтэй төстэй байсан тул үзэгчид Хэнк Гринийг зохиолоо ChatGPT-ээр бичүүлсэн гэж таамагласан байна. Хэдийгээр Грин уг хэллэгийг өөрөө аяндаа хэлсэн гэж тайлбарласан ч, өөрийн судалгааны ажилдаа хиймэл оюуныг хэт их ашиглаж байснаа хүлээн зөвшөөрчээ.
Ажлын арга барилаа өөрчилнө
Хэнк Грин Reddit хуудсандаа бичсэн урт тайлбартаа өөрийгөө “маш их дарамт дор” ажиллаж байсан гэдгээ дурдаад, хиймэл оюуныг ашиглах нь өөрт нь болон дэлхий нийтэд сайнаар нөлөөлөхгүй гэдгийг ойлгосон гэжээ. Тэрээр цаашид видео бүтээх тоогоо багасгаж, хоёр онлайн үгийн тоглоомыг түр зогсоохоор төлөвлөж байгаагаа мэдэгдсэн байна.
Complexly байгууллагаас гаргасан мэдэгдэлд дурдсанаар, тэдний бодлогоор хиймэл оюуныг зөвхөн урьдчилсан судалгааны ажилд ашиглахыг зөвшөөрдөг бөгөөд видеоны зохиол бичих, засварлах, баримт шалгахад ашиглахыг хатуу хориглодог аж. Грин хиймэл оюуныг судалгааны эх сурвалж олоход ашигладаг байсан ч, энэ нь түүнийг сэдвийг өөрийнхөөрөө судлах, гүнзгийрүүлэн ойлгох боломжийг нь хязгаарлаж байсан гэдгээ хүлээн зөвшөөрөв.
“Миний үгс бол минийх байх ёстой гэдгийг та бүхэн мэдэх хэрэгтэй” хэмээн Грин онцолсон бөгөөд одоо тэрээр контент бүтээх үйл явцаа эргэн харж, өөрчлөлт оруулахаар ажиллаж байна.
