Хятад улсын прокурорын байгууллагын албан ёсны хэвлэлд блокчэйн технологитой холбоотой нотлох баримт бүрдүүлэх шинэ дүрмийг хэрэгжүүлэх тухай нийтлэл гарчээ. Уг нийтлэлд крипто холигч (crypto mixer) болон нууцлалын зоос (privacy coin) ашиглах нь мөнгө угаах гэмт хэргийн шинж тэмдэг байж болзошгүй гэсэн байр суурийг илэрхийлсэн байна.
Тус нийтлэлд хууль сахиулах байгууллагууд крипто хэрэглэгчдийн санаа зорилгыг урьдчилан таамаглах, блокчэйн дээрх гүйлгээг илүү нарийвчлан шалгах эрх зүйн орчныг бүрдүүлэх шаардлагатай байгааг онцолсон байна. Тодруулбал, прокурорууд блокчэйн дээрх нотлох баримтыг цуглуулах, үнэлэх журамд өөрчлөлт оруулахыг уриалж байгаа аж.
Мөн хууль бус үйл ажиллагаанаас хураан авсан криптовалютыг борлуулах зорилгоор төрийн мэдлийн тусгай платформ байгуулах санааг дэвшүүлжээ. Энэхүү платформ нь хураагдсан хөрөнгийг зах зээлд хэрхэн эргэлтэд оруулах асуудлыг зохицуулах боломжтой гэж үзэж байна.
Одоогоор энэхүү санал нь прокурорын байгууллагын түвшинд хэлэлцэгдэж буй асуудал бөгөөд албан ёсны хууль тогтоомж болон хэрэгжих эсэх нь тодорхойгүй хэвээр байна. Крипто холигч болон нууцлалын зоос нь хэрэглэгчийн гүйлгээг нууцлах зориулалттай технологиуд бөгөөд эдгээрийг ашиглах нь хууль сахиулах байгууллагуудын анхаарлыг татаж эхлээд байна.
