Хөгжмийн зохиогчийн эрхийн төлөөлөл болох BMI (Broadcast Music, Inc.) байгууллага АНУ-ын Флорида мужийн Майами-Дэйд дүүргийн Корал Гэйблс хотын Миракл Майл гудамжинд шинэ салбар оффисоо нээлээ. Энэхүү алхмаар дамжуулан тус байгууллага Өмнөд Флорида, Пуэрто-Рико болон Латин Америкийн уран бүтээлчдэд үзүүлэх үйлчилгээ, хамтын ажиллагаагаа бэхжүүлэх зорилго тавьж байна.
Нээлтийн үйл ажиллагааны үеэр Латин поп дуучин, дуу зохиогч Zulia ая дуугаа өргөсөн юм. Мөн Billboard-ийн хамтарсан ерөнхий захирал Лейла Кобо тус уран бүтээлчийг тайзнаа танилцуулж, Латин хөгжмийн үзүүлэх нөлөөний талаар тууз хайчлах ёслолын үеэр онцлон үг хэлжээ.
Уран бүтээлчдийн шинэ гэр
BMI-ийн гүйцэтгэх захирал Майк О'Нил энэ үеэр хэлэхдээ, шинэ оффис нь зөвхөн Майами төдийгүй дэлхийн өнцөг булан бүрээс ирэх дуу зохиогч, хөгжмийн продюсеруудыг угтан авах таатай орон зай болно гэдгийг тодотгосон байна. Тус байгууллагын Орлого, уран бүтээл эрхэлсэн захирал Майк Стайнберг Латин хөгжим одоогоор урьд өмнө байгаагүй хүчээ авч, тэргүүлэх чиглэл болж байгааг дурдаад Майами хот нь бүтээлч төв цэг гэдгийг онцолжээ.
Түүнчлэн BMI-ийн Латин хөгжмийн асуудал хариуцсан дэд ерөнхийлөгч Хесус Гонзалес тэдний хувьд зөвхөн ажлын байр төдийгүй уран бүтээлчид хоорондоо холбогдож, шинэ санаа нь дуу болж хувирах бүтээлч "гэр"-ийг бий болгохыг зорьсон гэж тайлбарласан байна.
Төв нь Нью-Йорк хотод байрладаг BMI нь нийт 1.5 сая гаруй дуу зохиогч, хөгжмийн зохиолч, нийтлэгчдийн 25 сая гаруй бүтээлийн олон нийтэд тоглогдох эрхийг төлөөлдөг томоохон байгууллага юм. Тус байгууллага нь Нью-Йоркоос гадна Лос-Анжелес, Нэшвилл, Атланта, Остин, Вашингтон зэрэг хотуудад салбартайгаас гадна Их Британийн Лондон хотод олон улсын төвтэй билээ.
