Холимог тулааны ялагдашгүй тамирчин Дуглас да Лапа Дана Уайтын нэрэмжит "Contender Series" (DWCS) тэмцээний 10 дахь долоо хоногийн хүрээнд өрсөлдөгчөө ялж, албан ёсоор UFC-ийн гэрээ байгуулах эрхтэй боллоо.
Мягмар гаргийн үдэш "Meta APEX"-т болсон тулаанд Рио-де-Жанейро хотоос гаралтай Дуглас да Лапа нутаг нэгт дунд жингийн тулаанч Дави Кабралтай тулсан юм. Эхний үед хоёр тамирчин ширүүн өрсөлдсөн бол хоёрдугаар үеэс да Лапа санаачилгыг гартаа авчээ. Улмаар шийдвэрлэх үе эхлээд дөрвөн минут хагас гаруй хугацаа үлдээд байхад тэрээр баруун дэгээ цохилтоор Кабралыг унагаж, шүүгч тулааныг зогсоосноор ялалт байгуулсан байна. Энэ нь түүний ялалтын цувралыг долоо болгож ахиулсан бөгөөд сүүлийн дөрвөн ялалтаа бүгдийг нь цагаас өмнө дуусгажээ.
Тулааны дараа да Лапа хөлбөмбөгийн супер од Криштиану Роналдугийн алдарт "Siuuu" хөдөлгөөнийг хийн ялалтаа тэмдэглэсэн юм. Тэрээр хэвлэлийн бага хурал дээр хэлэхдээ, Роналду бол зөвхөн спортод төдийгүй амьдрал дээрх түүний хамгийн том шүтээн болохыг онцолжээ.
Да Лапа өгүүлсэндээ: "Амжилтад бүрэн төвлөрсөн, маш шаргуу бэлтгэл хийдэг, одоо 40 нас хүрсэн ч мянган зорилгынхоо араас тэмүүлсээр байгаа тэр хүнийг би зөвхөн тамирчид эсвэл хөлбөмбөгчдөд төдийгүй амьдралд бүх хүмүүст урам зориг өгдөг гэж хэлдэг. Тэрээр алдар хүндэд үнэ цэн бий гэдгийг мэдэрч, түүнийг өдөр бүр төлөхөд бэлэн байдаг" хэмээн дурдсан байна.
