Дэлхийн хөлбөмбөгийн хамгийн том баяр болох 2026 оны ДАШТ-ийг угтан АНУ-ын хөлбөмбөгийн холбоо болон SiriusXM (АНУ-д алдартай хиймэл дагуулын радио суваг) хамтран сонирхолтой төсөл эхлүүлжээ. Энэхүү төслийн хүрээнд АНУ-ын шигшээ багийн тамирчид талбай дээр гарахаасаа өмнө эсвэл бэлтгэлийн үеэр ямар хөгжим сонсож, хэрхэн эрч хүч авдаг болохоо "Global Soccer Guest DJs" буюу "Хөлбөмбөгийн зочин DJ" нэртэй цуврал жагсаалтаар дамжуулан хуваалцаж байна.
Энэ удаагийн онцлох тамирчдаар Майлс Робинсон, Марк Маккензи, Мэтт Тернер, Макс Арфстен болон Мэтт Фриз нар тодорчээ. Тэд өөрсдийн дуртай уран бүтээлчид болон тухайн өдрийн сэтгэл санааг хөглөдөг дуунуудаасаа бүрдсэн жагсаалтыг SiriusXM платформоор дамжуулан сонсогчдод хүргэж байна. Энэ нь зөвхөн хөлбөмбөг гэлтгүй, тамирчдын хувийн амьдрал, хөгжмийн таашаалыг шүтэн бишрэгчидтэй нь илүү ойртуулах зорилготой юм.
Хөлбөмбөгчид бэлтгэлийн үеэр ихэвчлэн эрч хүчтэй хип-хоп эсвэл поп урсгалын дуунуудыг илүүд үздэг нь тэдний жагсаалтаас харагдаж байна. Энэхүү хамтын ажиллагаа нь 2026 онд АНУ, Канад, Мексик улсуудад хамтран зохион байгуулагдах хөлбөмбөгийн дэлхийн аварга шалгаруулах тэмцээнийг сурталчлах ажлын нэг хэсэг бөгөөд спортын ертөнц болон хөгжмийн салбарыг нэгтгэж буй томоохон алхам болж байна.
Хөгжмийн хорхойтнууд болон хөлбөмбөг сонирхогчид эдгээр тамирчдын сонгосон дуунуудыг SiriusXM-ийн албан ёсны сувгуудаар дамжуулан хүлээн авч сонсох боломжтой юм.
