Хөлбөмбөг бол зүгээр нэг спорт биш, энэ бол дэлхийг нэгтгэдэг хүч гэдгийг Шотландын иргэн Крэйг Фрэйзер өөрийн биеэр баталж байна. Тэрээр 2026 онд АНУ, Канад, Мексик улсуудад хамтран зохион байгуулагдах хөлбөмбөгийн Дэлхийн аварга шалгаруулах тэмцээнийг угтан, Америкчуудад хөлбөмбөгийн хайрыг түгээх зорилгоор Лос-Анжелес хотоос Нью-Йорк хүртэлх 3000 гаруй миль (ойролцоогоор 4800 км) замыг явган туулахаар шийджээ.
Фрэйзер олон сарын турш үргэлжилсэн энэхүү аяллаа дуусгахад тун ойрхон ирээд байна. Тэрээр АНУ-ын өргөн уудам газар нутгийг хөндлөн гулд алхахдаа замдаа таарсан олон хүмүүстэй уулзаж, хөлбөмбөгийн спортын гайхамшгийг сурталчилж яваа юм. Түүний энэ зоригтой алхам цахим орчинд маш хурдан тархаж, олон мянган хүний анхаарлыг татаад байна. Олон хүмүүс түүнийг "боломжгүй зүйлийг боломжтой болгож байна" хэмээн магтаж, эр зоригийг нь биширч байна.
Тэрээр зөвхөн спортын сурталчилгаа хийгээд зогсохгүй, хүн амьдралдаа зорилготой байж, түүнийхээ төлөө тууштай тэмцвэл юуг ч бүтээж болно гэдгийг өөрийн үйлдэлээр харуулж байгаа юм. Крэйг Фрэйзерын энэхүү аялал нь 2026 оны ДАШТ-ийг тэсэн ядан хүлээж буй хөлбөмбөгийн фанатуудад урам зориг өгч байна.
Одоогоор тэрээр аяллаа амжилттай дуусгаж, Нью-Йорк хотод хөл тавихад тун бага хугацаа үлдээд байна. Түүнийг барианд ороход дэлхийн өнцөг булан бүрээс хөлбөмбөгийн хорхойтон залуус болон дэмжигчид нь хүлээж байна. Энэхүү аялал нь спортын ертөнцөд жинхэнэ утгаараа "хөлбөмбөгийн халуурал" эхэлж байгааг илтгэж байна.
