Хөлбөмбөгийн ертөнцийн хамгийн том баяр болох 2026 оны Дэлхийн аварга шалгаруулах тэмцээн АНУ, Канад, Мексик улсуудад болохоор товлогдсон билээ. Гэвч тэмцээн болохоос өмнө АНУ-ын виз олгох журам болон аяллын хязгаарлалтууд олон улсын хөгжөөн дэмжигчдийн дунд маргаан дагуулаад байна.
Дэлхийн өнцөг булан бүрээс ирэх хөлбөмбөг сонирхогчид АНУ-ын визний процесс хэт удаан, төвөгтэй, мөн зарим тохиолдолд үндэслэлгүйгээр татгалздаг гэж шүүмжилж байна. Хөгжөөн дэмжигчдийн үзэж буйгаар, энэ нь "ард түмний спорт" гэгддэг хөлбөмбөгийн утга учир болох эв нэгдлийг үгүйсгэж, зөвхөн эрх мэдэл бүхий хүмүүст зориулсан хаалттай арга хэмжээ болж хувирч байгаа аж.
Ялангуяа хөгжиж буй орнуудын хөгжөөн дэмжигчид визний ярилцлагын тов авах, санхүүгийн чадамжаа батлах зэрэгт хүндрэл учирч байгаа нь тэднийг тэмцээн үзэх боломжоос шууд хасч байна гэж үзэж байна. Фенүүдийн төлөөлөл "Бид энэ тэмцээнийг өөрсдийнхөө төлөө биш, харин АНУ-ын бодлогод нийцсэн хүмүүст зориулсан шоу болж байгааг харж байна" хэмээн сэтгэгдлээ илэрхийлжээ.
Олон улсын хөлбөмбөгийн холбоо (FIFA) болон зохион байгуулагч орнуудын зүгээс энэ асуудалд одоог хүртэл тодорхой шийдэл гаргаагүй байгаа нь нөхцөл байдлыг улам хурцатгаж байна. Хэдийгээр аюулгүй байдлын асуудал чухал ч, спортын баяр нь хил хязгааргүй байх ёстой гэсэн зарчим энэ удаагийн Дэлхийн аваргаар зөрчигдөж магадгүй байна.
Энэхүү асуудал нь зөвхөн визний асуудал биш, харин спортын ертөнцөд улс төрийн шийдвэр хэрхэн нөлөөлдгийг харуулсан тод жишээ болж байна. Ирэх жилүүдэд АНУ-ын зүгээс визний бодлогодоо уян хатан хандахгүй бол, олон мянган үнэнч хөгжөөн дэмжигчид цэнгэлдэх хүрээлэнгийн гадна үлдэх нь тодорхой болоод байна.
