Дэлхийд алдартай байр түрээсийн Airbnb платформын үүсгэн байгуулагч бөгөөд гүйцэтгэх захирал Брайан Чески саяхан өөрийн X (хуучнаар Twitter) хуудсаараа дамжуулан бодит хөрөнгийг токенжуулах (real-world asset tokenization) сэдвээр байр сууриа илэрхийлжээ. Тэрээр үүнийг өмчлөлийн харилцаан дахь саад бэрхшээлийг арилгаж, итгэлцлийг бэхжүүлэх боломж гэж үзэж байна.
Санхүүжилтийн шинэ боломж
Airbnb нь өнөөдрийн байдлаар 9 сая гаруй идэвхтэй байр, 5.5 сая гаруй түрээслүүлэгчтэй томоохон сүлжээ юм. Хэдийгээр тус компани токенжуулалтын ямар нэгэн бүтээгдэхүүн гаргахаа албан ёсоор зарлаагүй байгаа ч, Ческигийн санаа нь түрээслүүлэгчдэд зориулсан санхүүжилтийн шинэ гарцыг хөндөж байна. Тухайлбал, платформын өгөгдөл болон төлбөрийн түүхт үндэслэн түрээслүүлэгчдэд урьдчилсан санхүүжилт олгох, үүнийг токенжуулсан нэхэмжлэлээр баталгаажуулах боломжтой гэж үзжээ.
Итгэлцэл ба хөрөнгийн удирдлага
Airbnb-ийн санхүүгийн тайланд дурдсанаар, тус компани нь байрны эзэн биш бөгөөд зөвхөн түрээсийн зуучлагчийн үүрэг гүйцэтгэдэг. Иймд хэрэв ийм санхүүжилтийн систем хэрэгжвэл, энэ нь Airbnb-ийн өөрийнх нь балансад нөлөөлөхгүйгээр, гуравдагч талын зээлдүүлэгчид, хөрөнгө оруулагчид болон тусгай зориулалтын байгууллагуудаар дамжин явагдах боломжтой аж.
Брайан Чески энэхүү санаагаа Robinhood платформын гүйцэтгэх захирал Влад Теневийн “бүтээмжтэй хөрөнгүүдийг блокчэйн сүлжээнд шилжүүлэх нь крипто зах зээлийн өсөлтийг хурдасгана” гэсэн байр суурьтай холбон тайлбарласан юм. Одоогоор Airbnb нь түрээслүүлэгчдийн орлогын баталгааг зээлдүүлэгчдэд өгөх замаар санхүүжилт авахад нь туслах туршлагатай бөгөөд цаашид үүнийг илүү дэвшилтэт технологиор хөгжүүлэх боломжтой гэдгийг онцолсон байна.
