Технологийн салбарын аварга Apple компани энэ онд олон өөрчлөлтийг хийгээд байна. Тухайлбал, Тим Күүк албан тушаалаасаа бууж, оронд нь Жон Тернус томилогдсон бол WWDC 2026 арга хэмжээний үеэр Siri AI албан ёсоор танилцуулагдсан юм. Мөн тус компани хямд үнэтэй MacBook-ийг худалдаанд гаргасны дараахан үнээ өсгөсөн нь олны анхаарлыг татаад байна.
Mashable болон CNET групп (ZDNET, PCMag, CNET, Lifehacker) хамтран "Big Guessing Game: Apple Edition" хэмээх тааврын тэмцээнийг зохион байгуулж, уншигчдаасаа энэ онд гарах Apple-ийн төхөөрөмжүүдийн талаар таамгаа дэвшүүлэхийг хүсчээ. Санал асуулгад оролцогчид есдүгээр сард танилцуулагдах Apple Watch хожих боломжтой юм.
Хэрэглэгчдийн таамаг
Санал асуулгын хоёр дахь шатанд уншигчдын ирүүлсэн хариултуудаас дараах сонирхолтой үр дүнгүүд гарчээ:
- Нугардаг iPhone: Олон жилийн турш яригдаж буй нугардаг iPhone буюу iPhone Ultra энэ онд гарах эсэх дээр санал асуулгад оролцогчдын 68 хувь нь гарах болно гэсэн хүлээлттэй байна.
- Хар өнгийн iPhone: iPhone 17 Pro-д хар өнгийн сонголт байгаагүй нь шүтэн бишрэгчдийнх нь хувьд сэтгэл дундуур байсан зүйлсийн нэг байв. Тэгвэл уншигчдын 68 хувь нь энэ жил хар өнгийн iPhone 18 Pro эсвэл Pro Max гарах болов уу гэж таамаглаж байна.
- Мэдрэгчтэй дэлгэцтэй MacBook: Энэ асуултад оролцогчид хоёр хуваагдсан бөгөөд 55 хувь нь тийм гэж хариулжээ.
- Шинэ AirPods: Оролцогчдын дийлэнх буюу 74 хувь нь энэ онд шинэ AirPods гарна гэдэгт итгэлтэй байна.
- M6 чип: Ирэх намар Apple-ийн график төлөвлөгөөний дагуу M6 чип гарах магадлалтай бөгөөд оролцогчдын 65 хувь нь үүнийг баталж байна.
Одоогоор уг тэмцээний сүүлийн шат үргэлжилж байгаа бөгөөд есдүгээр сарын дундуур болох iPhone танилцуулах арга хэмжээний өмнө оролцох боломжтой юм.
