Apple компани сүүлийн гурван жилийн хугацаанд анх удаа дуу чимээ тусгаарлах (ANC) технологи бүхий шинэ Beats загварын чихэвч дээр ажиллаж байгаа бололтой бөгөөд үүнтэй холбоотой мэдээллүүд ар араасаа цацагдсаар байна.
MacRumors-ийн мэдээлснээр, Бразилын Харилцаа холбооны үндэсний агентлагийн бүртгэлд наймдугаар сарын 20-ны пүрэв гарагт нэгэн шинэ Beats чихэвч бүртгэгдсэнийг олж харжээ. Тус бүртгэлд чихэвчний албан ёсны нэр ороогүй боловч A3577 гэсэн загварын дугаартай байна. Яг энэ загварын дугаар өнгөрсөн тавдугаар сард АНУ-ын Холбооны холбооны комиссын (FCC) бүртгэлд Apple компанийн үйлдвэрлэсэн "Bluetooth over-ear" чихэвч гэсэн тодорхойлолттойгоор бүртгэгдэж байсан юм.
Шинэ загварын онцлог ба үнэ
Reddit дээрх мэдээллүүдээс үзвэл тус төхөөрөмж нь Beats 360 нэртэй байж магадгүй байна. r/beatsbydre сүлжээний хэрэглэгчид Amazon UK дээр түр тавигдаад устсан зарыг олж харсан бөгөөд уг бүртгэлд чихэвчийг нугалардаг хийцтэй, сольж болдог зөөлөвчтэй, орон зайн дуугаралт (spatial audio) болон хөлс, усны хамгаалалттай (IPX4) гэж тодорхойлжээ. Түүнчлэн Beats Studio Pro загвараас дуу чимээг 1.75 дахин илүү тусгаарлах чадвартай байж болзошгүй гэсэн дэлгэцийн агшин тархсан байна.
Уг дэлгэцийн агшин дахь чихэвчний загвар нь AirPods Max-ийг санагдуулам сүлжмэл материалаар бүрсэн хүрээ болон чихэвчний аягатай байсан бөгөөд ягаан, цагаан, цэнхэр ("sky blue") өнгөний сонголттой, боломжит үнэ нь 299 ам.доллар байх магадлалтай харагджээ.
Алдартай тамирчдын зүүсэн чихэвч
Apple уг төхөөрөмжөө бүрэн нууцалж чадаагүй бололтой. Энэ зуны FIFA-гийн үеэр хөлбөмбөгийн одод болох Антони Робинсон, Ламин Ямал, Ли Кан Ин нар олон нийтэд зарлагдаагүй шинэ Beats чихэвч зүүсэн байдалтай харагдсан нь Amazon UK дээрх зурагтай ижил байжээ.
Мөн хамгийн сүүлийн macOS бета хувилбарт хоёр шинэ чихэвчний код нэр дурдагдсан тул зөвхөн ганц Beats 360 загвараар хязгаарлагдахгүй байж магадгүй юм. Apple компани Beats брэндийн бүтээгдэхүүнийг тусгай арга хэмжээн дээр бус ихэвчлэн хэвлэлийн мэдэгдлээр зарладаг тул есдүгээр сарын iPhone танилцуулга дээр зарлах магадлал бага байна. Одоогоор тус компани эдгээр цуу яриаг албан ёсоор батлаагүй байна.
