Технологийн аварга Apple компани мягмар гарагт “Welcome Home” нэртэй арга хэмжээ зохион байгуулах гэж байна. Энэхүү арга хэмжээгээр тэд ухаалаг гэрийн бүтээгдэхүүний салбарт томоохон шинэчлэлт хийж, хэд хэдэн шинэ төхөөрөмж танилцуулах төлөвтэй байгаа талаар Mashable мэдээллээ.
Дэлгэцтэй HomeHub болон гал тогооны төхөөрөмж
Bloomberg агентлагийн мэдээлэл болон салбарынхны таамаглаж буйгаар тус арга хэмжээний үеэр ширээ, тавцан дээр байрлуулах зориулалттай, дэлгэц бүхий HomeHub төхөөрөмж танилцуулагдаж магадгүй байна. Тус төхөөрөмжийн дэлгэц нь “iPhone Duo”-той төстэй байж болзошгүй бөгөөд ухаалаг гэрийн удирдлагыг хялбарчлах зорилготой юм. Түүнчлэн гал тогооны тавцанд тохирсон загвар болон бусад хувилбарууд гарах магадлалтай гэж үзэж байна.
Хиймэл оюун ухаан бүхий HomePod болон Apple TV 4K
Үүнээс гадна Apple-ийн далд кодоос шинэ HomePod mini 2-ын мэдээлэл илэрсэн тул уг төхөөрөмж чипийн шинэчлэлттэйгээр танилцуулагдаж магадгүй байна. Шинэ HomePod-ууд нь хиймэл оюун ухаан болон илүү ухаалаг Siri туслахтай болж, гэрийн кино театрын орчинд хүрээлэх дуугаралт үзүүлэх боломжтой болох төлөвтэй байна.
Мөн арга хэмжээний үеэр техник хангамжийн шинэчлэлттэй Apple TV 4K төхөөрөмж болон шинэ удирдлага танилцуулагдаж болзошгүй байгаа тухай сэтгүүлч Брижит Кэригийн тоймд дурджээ.
