Технологийн аварга Apple компани хэрэглэгчдийн эрх ашгийг зөрчсөн гэх хамтын нэхэмжлэл бүхий шүүхийн маргааныг эцэслэж, АНУ дахь iPhone хэрэглэгчдэд нийт 250 сая ам.долларын нөхөн төлбөр олгохоор тохиролцсон байна.
Энэхүү маргаан нь Apple 2024 онд iPhone 16 цувралаа танилцуулахдаа дараагийн үеийн Siri болон Apple Intelligence хиймэл оюуны цогц шийдлийг амласантай холбоотой юм. Мөн тус компани эдгээр боломжуудыг iPhone 15 Pro болон Pro Max загваруудад нэвтрүүлнэ гэж мэдэгдэж байв. Гэвч шүүхэд гаргасан гомдолд эдгээр функцүүд амласан хугацаандаа хэрэгжээгүйгээс гадна Apple өөрсдийн зарласан хугацаанд тэдгээрийг хүргэж чадахгүй гэдгээ мэдэж байсан гэж буруутгажээ. Тухайлбал, шинэчлэгдсэн Siri-ийн бета хувилбар хэрэглэгчдэд амласнаас хоёр жилийн дараа л саяхан гарсан байна.
Иймд уг нэхэмжлэлээр Apple-ийг хэрэглэгчийн эрхийг хамгаалах хуулийг зөрчиж, тухайн үед байгаагүй функцүүдийг сурталчлах замаар шинэ iPhone худалдан авах сэдэл төрүүлсэн гэж үзжээ. Хэдийгээр Apple ямар нэгэн буруутай үйлдэл хийснээ хүлээн зөвшөөрөөгүй ч нөхөн төлбөрт 250 сая ам.доллар төлөхийг зөвшөөрсөн байна.
Нөхөн төлбөрийг хэн, хэрхэн авах вэ?
Энэхүү нөхөн төлбөрийг АНУ-д оршин суудаг, 2024 оны 6-р сарын 10-наас 2025 оны 3-р сарын 29-ний хооронд iPhone 15 Pro, iPhone 15 Pro Max эсвэл iPhone 16-ын аль нэг загварыг (iPhone 16, 16e, 16 Plus, 16 Pro, 16 Pro Max) худалдан авсан хэрэглэгчид авах эрхтэй юм. Түүнчлэн Apple-ийн ажилтан эсвэл төлөөлөгч байж болохгүй гэсэн шаардлага тавигджээ.
Шаардлага хангасан хэрэглэгч ойролцоогоор 25 ам.доллар авах боломжтой бөгөөд нийт өргөдөл гаргагчдын тоо болон хуулийн зардлаас хамаарч уг дүн буурах эсвэл хамгийн ихдээ 95 ам.доллар хүртэл өсөж магадгүй байна.
Хэрэглэгчид өөрийн төхөөрөмжийн серийн дугаарыг ашиглан Smartphone AI Settlement цахим хуудсаар дамжуулан хүсэлтээ илгээх бөгөөд нэхэмжлэл гаргах эцсийн хугацаа нь 2026 оны 12-р сарын 21 юм.
