Технологийн аварга Apple компани өөрийн зарим хуучин бүтээгдэхүүнүүдийг албан ёсоор хоцрогдсон (obsolete) загваруудын жагсаалтад нэмсэн байна. Пүрэв гарагт хийсэн энэхүү шинэчлэлтээр ухаалаг утасны дизайнд томоохон өөрчлөлт авчирч байсан iPhone X болон 2018 оны 15 инчийн MacBook Pro компьютерыг уг жагсаалтад оруулжээ.
Бүтээгдэхүүн хоцрогдсон жагсаалтад орно гэдэг нь тухайн төхөөрөмжүүд Apple-ийн албан ёсны салбарууд болон гэрээт засварын төвүүдэд техник хангамжийн (hardware) үйлчилгээ авах боломжгүй болж байгааг илэрхийлдэг.
Шинэ эринийг эхлүүлсэн iPhone X
Анх 2017 онд худалдаанд гарч байсан iPhone X нь дэлгэцийнхээ дээд хэсэгт камер болон мэдрэгч бүхий «халзан» (notch) тайралттай загварчилсан анхны утас байв. Энэхүү загвар нь утасны хүрээг бараг үгүй болгож, орчин үеийн iPhone-уудын шинэ эринийг эхлүүлсэн түүхтэй.
Өдгөө бараг есөн жилийн настай болж буй iPhone X нь iOS үйлдлийн системийн шинэ хувилбаруудыг авахаа хэдийн больсон бөгөөд хэрэв та одоог хүртэл уг утсыг ашиглаж байгаа бол шинэ утас руу шилжих цаг нэгэнт болсныг илтгэж байна.
Intel процессортой MacBook Pro-ийн төгсгөл
Apple компани iPhone X-ээс гадна 2018 оны 15 инчийн MacBook Pro загварыг мөн хоцрогдсон жагсаалтад орууллаа. Уг зөөврийн компьютер нь Intel процессортой байсан бөгөөд Apple компани 2020 оноос эхлэн өөрсдийн бүтээсэн M1 чип бүхий MacBook Pro-г танилцуулж, түүнээс хойш өөрийн чип рүү бүрмөсөн шилжсэн юм.
Ирээдүйн өөрчлөлтүүд
iPhone X загвар ийнхүү 2026 онд хоцрогдсон жагсаалт руу шилжиж байгаа нь бэлгэдлийн шинж чанартай юм. Учир нь Apple компани яг энэ жил огт өөр өөрчлөлтийг авчрах магадлалтай бөгөөд нугардаг iPhone Ultra загвараа танилцуулж магадгүй байна. Тус загварыг улс орнуудаар хэсэгчлэн, шат дараатайгаар худалдаанд гаргаж магадгүй гэсэн таамаг байгаа юм.
Мөн Apple компани 2027 онд дэлгэцэн дээрээ ямар ч камерын тайралтгүй, бүхэлдээ шилэн загвартай iPhone 20 Pro-г танилцуулахаар төлөвлөж байгаа тухай цуу яриа байна. Энэ нь дэлгэцэн дээрээ камерын зүсэлттэй iPhone-уудын эрин үе төгсөх эхлэл байж болзошгүй юм.
