Дэлхийн томоохон стриминг үйлчилгээ болох Apple Music захиалгынхаа төлбөрийг нэмэгдүүлж байгаагаа албан ёсоор зарлалаа. Тус компани энэхүү шийдвэрээ лицензийн зардал өссөнтэй холбон тайлбарлаж байна. 2022 оны аравдугаар сараас хойш анх удаа хийж буй энэхүү үнийн өөрчлөлт даруй хэрэгжиж эхэлжээ.
Шинэ тарифын дагуу Их Британи болон Европт хувь хүний багцын үнэ 10.99-өөс 11.99 фунт/евро болж, гэр бүлийн багцын үнэ 16.99-өөс 19.99 фунт/евро болж тус тус нэмэгдсэн байна. АНУ-ын хувьд оюутны багц 5.99-өөс 6.99 доллар, хувь хүнийх 11.99 доллар, харин гэр бүлийн багц 19.99 доллар болж өсчээ.
Сүүлийн үед стриминг платформуудын үнэ өсөх хандлага ажиглагдаж байгаа бөгөөд Spotify компани ч 2025 оны сүүлээр захиалгын төлбөрөө нэмэгдүүлсэн билээ.
Хиймэл оюун ухаан ба хөгжим
Үнийн өөрчлөлтөөс гадна Apple Music платформд хиймэл оюун ухаан (AI)-аар бүтээгдсэн агуулгыг таних шинэ журам хэрэгжиж эхэллээ. Өмнө нь хөгжмийн зохиолчид эсвэл түгээгчид AI ашигласан эсэхээ өөрсдөө сонгон тэмдэглэдэг байсан бол одоо шинэ контент байршуулахдаа үүнийг заавал тодорхойлох шаардлагатай болж байна. Энэ нь хүмүүсийн 97 хувь нь жинхэнэ дуу болон AI-аар бүтээсэн дууг ялгаж чаддаггүй гэсэн судалгааны үр дүнгийн дараа авч буй арга хэмжээ юм.
Бусад платформуудын хувьд Deezer компани AI-аар үүсгэсэн дуунуудыг мөнгөжүүлэхээс татгалзаж, Bandcamp платформ хиймэл оюун ухаанаар бүтээгдсэн бүх дууг хориглох шийдвэр гаргажээ.
