Хэрэглэгчийн өмнөөс бие даан үйлдэл хийх чадвартай хиймэл оюуны (AI agent) аппликэйшнүүд олширч байгаатай холбогдуулан Apple компани Mac компьютерынхоо аюулгүй байдлын тохиргоонд өөрчлөлт оруулахаар болжээ.
Энгийн аппликэйшнүүд компьютерын камер, микрофон гэх мэт тодорхой хэсэгт хандах хүсэлт гаргадаг бол зарим нөөцлөлтийн (backup) аппууд системийн файлууд, цахим шуудан, чат зэрэг бүх хэсэгт зэрэг хандах "Full Disk Access" буюу дискэнд бүрэн нэвтрэх зөвшөөрөл шаарддаг. Гэвч хэрэглэгчид энэхүү өргөн эрхийг олгосноор хиймэл оюуны аппууд тэдний бүх хувийн мэдээлэлд нэвтрэх кибер аюулгүй байдлын эрсдэл үүсэж болзошгүйг тэр бүр ойлгодоггүй байна.
Хувийн мэдээллийн эргэн тойрон дахь маргаан
Саяхан Inc. сэтгүүлийн тоймч Жэйсон Атен Meta-ийн 5 сая гаруй таталттай Muse нэртэй хиймэл оюуны туслах нь түүний орон нутгийн чатын сан дахь зурвасуудыг бүхэлд нь синк хийж, даалгавар гүйцэтгэхдээ ашиглаж байсныг илрүүлсэн гэж мэдэгджээ. Атен уг зурваст нэвтрэх зөвшөөрлийг олгоогүй хэмээн хэлсэн бол Meta компани хэрэв хэрэглэгч зөвшөөрөл өгөхөөс татгалзсан тохиолдолд Muse ийм үйлдэл хийх боломжгүй хэмээн няцаасан байна.
Apple ямар арга хэмжээ авах вэ?
Apple компаниас хийсэн мэдэгдэлдээ, зарим хөгжүүлэгчид дискэнд бүрэн нэвтрэх эрхийг хэрэглэгчийн мэдэлгүйгээр хувийн файл, мэйл, зурвас, цахим түүх рүү хандах эрсдэлтэй байдлаар ашиглаж байна гэж онцолжээ.
Иймээс цаашид хэрэглэгч гуравдагч талын аппликэйшнд системд бүрэн нэвтрэх зөвшөөрөл олгохдоо илүү тодорхой алхмуудыг гараар баталгаажуулдаг нэмэлт хяналтын тохиргоог тун удахгүй нэвтрүүлэхээр болсноо зарлалаа.
