Технологийн салбарын аварга Apple компани ирэх есдүгээр сард шинэ iPhone 18 болон үйлдлийн системийнхээ хамгийн сүүлийн хувилбар болох iOS 27-г танилцуулахаар зэхэж байна. Гэвч iOS 27-ийн бета хувилбараас олдсон кодууд нь хэрэглэгчдийн анхаарлыг татаад байна.
Хязгаарлагдмал горим
9to5Mac сайтын мэдээлснээр, Apple компани болон гуравдагч талын зээлдүүлэгчид төлбөрөө хугацаанд нь төлөөгүй хэрэглэгчдийн утсыг алсаас "Restricted Mode" буюу хязгаарлагдмал горимд шилжүүлэх боломжтой болж магадгүй байна. Энэхүү горим идэвхжсэн тохиолдолд хэрэглэгч зөвхөн App Store, Цаг, Тохиргоо, Түрийвч болон Нууц үг зэрэг цөөн хэдэн аппликейшн болон виджетүүдийг л ашиглах боломжтой болох аж.
Энэхүү систем нь утас түрээслүүлэгч байгууллагууд гэрээний нөхцөл биелэгдэж байгаа эсэхийг тогтмол шалгах боломжийг олгоно. Хэрэв төлбөрийн үлдэгдэл үүсвэл хязгаарлагдмал горим автоматаар идэвхжих юм. Мөн энэхүү код дотор "Partner Finance Lock" буюу зээлээр авсан төхөөрөмжийг дахин худалдахыг хориглох түгжээний механизм байгаа нь тогтоогджээ.
Шинэ төлбөрийн систем
Apple компани удахгүй "Apple Upgrade" нэртэй түрээсийн хөтөлбөрийг эхлүүлэхээр төлөвлөж байгаа бөгөөд энэ нь тус компанийн борлуулалтын түүхэн дэх хамгийн том өөрчлөлтүүдийн нэг байх болно гэж Bloomberg-ийн шинжээч Марк Гурман үзэж байна. Энэхүү хөтөлбөрийг Klarna онлайн зээлийн байгууллагатай хамтран хэрэгжүүлэх бөгөөд хэрэглэгчид хоёр жилийн турш сар бүр төлбөр төлөх замаар утас эзэмших юм.
Технологийн салбарт төхөөрөмжүүдийн үнэ өсөж байгаа энэ үед компаниуд ийнхүү хяналтын арга хэмжээг чангатгаж байна. Хэдийгээр энэ нь төлбөрөө төлөөгүй хэрэглэгчдийн асуудлыг шийдвэрлэх арга боловч нөгөө талаас томоохон технологийн компаниуд хэрэглэгчдийн төхөөрөмжийг хэр зэрэг хянах эрхтэй вэ гэдэг асуултыг хөндөж байна. Apple компани одоогоор энэ асуудлаар албан ёсны тайлбар өгөөгүй байна.
